Në një kohë kur SPAK ka nisur hetimet lidhur me skandalin e përdorimit të të dhënave personale nga Rilindja, përmes patronazhistëve, në funksion të identifikimit të votuesve pro dhe kundër, Kryeministri Edi Rama nuk ka nguruar të marrë në mbrojtje pikërisht ata që janë kthyer si spiunët e sigurimit të diktaturës.
Në një vend normal Kryeministri minimalisht do të distancohej nga komentet diskriminuese që patrozhanistët e PS-së etiketojnë votuesit, pavarësisht nëse janë ose jo pjesë e komuniteteve të tilla si rome apo egjiptiane.
Por Rama vendosi nga Durrësi të marrë në mbrojtje patrozhainstët.
“Sot ata që nuk e dinë se çfarë pune, çfarë angazhimi të padukshëm ka brenda PS, kanë zbuluar fjalën patronazhist, dhe e sjellin vërdallë e vërdallë, duke e deformuar kuptimin e saj. Për faktin se ata nuk e dinë se PS, është një familje ku të angazhuarit brenda familjes punojnë.
Punojnë vullnetarisht, pas pune, pas shkolle, punojnë duke marrë nga koha e tyre e lirë për të mbuluar territorin shpirtëror të këtij vendi. Për të pasur komunikim të drejtpërdrejtë me njerëzit e zakonshëm të këtij vendi. Sepse beteja e përditshme e PS është beteja për të fituar mendjet dhe zemrat e njerëzve…Unë ju jam mirënjohës, të gjithë patronazhistëve, aktivistëve të PS. Pasi fitorja jonë, është një fitore që krijohet nga puna dhe angazhimi i tyre. Ju bëj thirrje që mos lini asnjë derë pa trokitur”, u shpreh Kryeministri.
