Partizani ka arritur një fitore komode 3-0 përballë Bylisit, në ndeshjen e vlefshme për javën e 27-të të Kategorisë Superiore.
Të kuqtë nuk e vunë për asnjë moment në dyshim këtë sukses, teksa në pjesën më të madhe të lojës janë shfaqur dominues duke krijuar raste të pastra për shënim.
Goli i parë i skuadrës së Dajës është për rekord. Stenio Junior arriti të shënonte pas vetëm 15 sekondash lojë. Futbollisti brazilian realizoi pas një gafe të portierit Qirko, teksa nuk ka falur, duke tundur rrjetën.
Ndërkohë dyfishimi i shifrave ka ardhur në minutën e 70-të me anë të Jasir Asanit. Anësori mposht portierin Qirko, pas asistit nga ana e Çinarit, shqiptari i Maqedonisë, kontrollon bukur topin brenda zonës dhe godet saktësisht me të majtën.
Goli i tretë dhe ai që vulosi fatet e takimit u realizua nga Çinari. Pas disa rasteve të pastra të shpërdoruara, sulmuesi lëviz bukur duke shmangur disa kundërshtarë, provon me të majtën në hyrje të zonës, teksa i ndihmuar edhe nga devijimit, topi përfundon në rrjetë.
Përfundimisht 3-0 dhe Partizani merr tre pikët duke u ngjitur në vendin e 3-të por me pikë të barabarta me vendin e dytë që mbahet nga Vllaznia.
