Një analizë e Shëndetit Publik në Angli, sugjeron se fushata e vaksinimit ka shpëtuar jetën e 10,400 personave mbi 60 vjeç, deri në fund të marsit.
Nga 8 dhjetori 2020, deri në fund të marsit 2021, mbi 15 milionë doza vaksinash u janë injektuar qytetarëve mbi 60 vjeç. Analiza e Shëndetit Publik, krahasoi numrat e vdekjeve aktuale, me ato të vdekjeve që ishin të pritshme nëse nuk do të ishte injektuar vaksina. Analiza mori parasysh kohën që duhet që qytetarët e vaksinuar të fillojnë të kenë imunitet.
Kështu, u arrit në konkluzionin se rreth 10,400 vdekje janë parandaluar deri në fund të marsit.
Analiza merr parasysh vetëm efektin direkt të vaksinave dhe jo faktin se vaksinat gjithashtu mund të ulin transmetueshmërinë e virusit, ndaj është e mundur që një numër më i madh se sa kaq vdekjesh të jenë parandaluar si pasojë e fushatës së vaksinimit.
Ministri i Shëndetësisë, Matt Hancock, tha është fantastike të shohësh, impaktin që ka patur vaksinimi.
“Dhjetë mijë familje nuk kanë humbur të dashurit e tyre. Shkenca është e qartë, vaksinat shpëtojnë jetë. Të treja vaksinat që ne kemi aprovuar janë konsideruar të sigurta dhe efektive nga rregulltori ynë i pavarur mjekësor i klasit botëror.
Të dhënat e publikuara sot, tregojnë përse është jetike që njerëzit të marrin edhe dozën e dytë të vaksinës. Kur njerëzit marrin ftesën, duhet të vaksinohen“, tha ai.
Në Mbretërinë e Bashkuar, deri në këto momente janë vaksinuar mbi gjysma e popullsisë mbi 18 vjeç, 31.9 milionë persona dhe 6.5 milionë prej tyre kanë marrë edhe dozën e dytë të vaksinës.
