Kryeministri Edi Rama ka vijuar akuzat edhe sot ndaj kreut demokrat Lulzim Basha, ndërsa e akuzon se po vendos në rrezik qytetarët me grumbullimet në takimet elektorale. Pa një program dhe pa një bilanc lidhur me 8 vitet e qeverisjes, Rama e ka përqëndruar fushatën në akuzat ndaj opozitës, ndërsa po përdor vaksinimin dhe rindërtimin si shtyllat kryesore me të cilat kërkon mandatin e 3-të si Kryeministër.
Që nga momenti i hapjes së fushatës, Rama ka nisur sulmet ndaj kreut demokrat Basha, i cili në pothuajse të gjitha qytetet e vendit po pritet nga disa dhjetra e qindra qytetarë, që me praninë e tyre po shprehin revoltën ndaj Qeverisë.
“Vaksinimi masiv është e vetmja armë që kemi por që të funksionojë duhet shoqëruar gjatë gjithë procesit të tij me distancimin. Është shumë i rëndësishëm. Të vaksinosh masivisht dhe të mos distancohesh, do të thotë të ngatërrohesh me këmbët e tua dhe të tregosh një kokëfortësi idioteske. Idioteske nga papërgjegjshmëria nga etja për pushtet, të mbledhësh njerëz dhe t’i ngjeshësh me njëri-tjetrin për të krijuar një imazh që këtu ka uragan dhe po vjen ndryshimi. Shikoni Kosovën, kishte rënie drastike që filloi teoria se u imunizua tufa, u desh fushata dhe sot numrat janë rritur, i humbjeve të jetës po ashtu. Edhe Mali i Zi. Bënin spote dhe sikur Covid-19 të mos e kishte prekur fare.
Pas fushatës me disa të marrë që u mblodhën bashkë dhe canga ata që rrinin në krye…. Larg qoftë mos ndodhtë këtu, ikën në botën tjetër. Tani çfarë borxhi u ka ky popull këtyre që duan të krijojnë iluzione se janë shumë dhe shpërndajnë virusin.
Pse duhet Shqipëria të bëhet viktimë? Si mund të dalësh në rrugë në formën më të papërgjegjshme. Duke sfiduar edhe ligjin edhe rregullat dhe duke u thënë se jemi mbi ligjin e mbi rregullin se jemi Partia Demokratike. Këtë gjë e dimë sepse e kanë bërë gjithmonë. Duan të tregojnë se janë uragan, por çfarë uragani, uragani i Noc Rrokut”, tha Rama.
