Policia e Beratit reagon pas denoncimit publik të shtetasit Xhimi Gjishti, i cili pretendoi se u ndje i kërcënuar pas publikimit në internet të videos që bëri xhiron e rrjetit e ku shfaqej qytetari duke i kërkuar llogari Blendi Klosit në një takim elektoral të PS në Urën Vajgurore.
Sipas njoftimit zyrtar të Policisë, qytetari nuk ka pranuar të bëjë kallëzim dhe të shpjegojë rrethanat e ngjarjes
“Drejtoria Vendore e Policisë Berat, nisur nga një lajm i publikuar në media për një shtetas i cili pretendon se është ofenduar dhe kanosur me numër të fshehtë nëpërmjet telefonit sqarojmë opinionin publik se: Nga shërbimet e DVP Berat menjëherë është organizuar puna dhe është marrë takim me shtetasin E.Gj nga fshati Drenovicë, i cili nuk ka pranuar të bëjë kallëzim dhe të spjegojë rrethanat dhe motivin e ngjarjes dhe nuk është gjetur e sekuestruar asnjë provë materiale nga hetimet paraprake. Drejtoria Vendore e Policisë Berat fton të gjithë qytetarë të kallzojnë çdo rast ku cënohen të drejtat e tyre dhe çdo rast të paligjmërisë”, thuhet në reagimin e policisë.
Ndërkohë, sipas drejtuesit politik të PD në qarkun e Beratit, Tomor Alizoti, personi në fjalë është tentuar të shoqërohet me forcë nga policia.
“Zotëria që ishte dje në aktivitetin e PS filmoi reagimin e një qytetari, i cili ishte brenda normave, një reagim demokrat që madje shumë qytetarë shqiptarë duhet ta kenë kundrejt çfarëdo lloj qeverie. U filmua nga një zotëri tjetër. Zotëria që e filmoi, madje edhe në film, shikohet që drejtuesi i PS në qarkun e Beratit, z.Klosi, shkon dhe i thotë fshiheni videon. Mesa e kam parë. Më vonë, zotëria që ka bërë videon, Xhimi Gishti, është ndjerë i kërcënuar. Ka komunikuar me kryetarin e PD Ura Vajgurore. Sipas protokollit, kreu i Urës Vajgurore më njofton mua si drejtues politik i qarkut. Dhe unë i kam thënë se jemi gati ta mbrojmë këtë njeri nga padrejtësisë”, u shpreh Alizoti për mediat.
