Nga Boldnews.al
Është institucion drejtësie, fjala e tyre mbetet e fundit dhe ata i venë kapakun çdo mosmarrëveshjeje, në mënyrë të “drejtë” të “pavarur” dhe në lexim të gërmës dhe frymës së ligjit. Kështu duhet të ishte, por kështu nuk është.
Kolegji Zgjedhor, për të dytën herë brenda pak ditësh është kthyer në “noteren” e broshurave të Partisë Socialiste dhe të kreut të qeverisë Rama.
Vendimi më i fundit ishte që në fletën e votimit të mos jenë të shënuar kandidatët për deputetë me emrat e tyre, por me numra. Ashtu si bagëtive u vendosët një numër (matrikull), ashtu do të identifikohen edhe kandidatët për deputetë. Në të vërtetë mund të mos ketë rëndësi në rezultatin përfundimtar një listë me emra apo numra, por vendimi i Kolegjit Zgjedhor, që tani ngre një alarm të madh. Duhet pasur frikë dhe mbi të gjitha të mbahen nën vëzhgim.
Faktet tregojnë se në të dyja rastet kur çështja ka kaluar në Kolegjin Zgjedhor, gjyqtarët kanë vendosur në favor të kërkesës së Partisë Socialiste. Duket se për ta, nismat e PS-së apo të Ramës janë “gërma dhe fryma e ligjit”.
Dilemat janë se nëse për çështje të rëndësishme që varen edhe fatet e pushtetit do të bien në duart e Kolegjit Zgjedhor, cili do të jetë vendimi? Gjyqtarët janë të trembur, gati të “tredhur mendërisht” për shkak të vetingut. Ajo është “sëpata” që qëndron në kokën e tyre, sepse e dinë që fijet e vetingut tërhiqen nga pushteti i sotëm, duke e kthyer edhe drejtësinë e re në një lojë të vjetër.
Për të shpëtuar veten, apo për të qenë “gjyqtarët e preferuar” të pushtetit të sotëm, anëtarët e Kolegjit Zgjedhor duket se më shumë se ligjin, po njohin individin, të “plotfuqishmin” që ka një emër Edi Rama. Edhe ai do të jetë një “numër” në fletën e votimit, duke zgjedhur 8-tën në dy qarqet Vlorë dhe Durrës, por ky matrikullim të çon në idenë e kahershme të Ramës për të mos lejuar listat e hapura.
Gara e ndershme dhe e barabartë atë e tremb, ndaj po vendos në lojën e zgjedhjeve çdo makinacion të mundshëm. nN fillim duke ndryshuar Kushtetutën me të ashtëquajturit “deputetë opozitarë”, (të cilët një pjesë sot i ka në listat e tij të kandidatëve) dhe tashmë edhe xhonglimet me fletën e votimit. Çfarëdo të kërkojë ai nëpërjet logos së PS-së me siguri do të gjejnë disa gjyqtarë që mantelin e zi që mbajnë mbi supe do e zëvendësojnë me ngjyrat e Rilindjes, ashtu sikurse e kërkon piktori…!
