Gjykata e Posaçme Kundër Krimit të Organizuar dhe Korrupsionit vendosi masën e sigurisë arrest me burg për të arrestuarit gjatë operacionit ku i zbuluan 18 baza armatimi dhe u zbardhën 3 ngjarje kriminale.
Konkretisht mbetën në burg: Blendi Deda, Flor Abazi, Paris Prenga, Petrit Shera, Algert Hysa, Bujar Jupi, Festim Mustafa, Arben Sufa dhe Klodian Kulla. Ky i fundit do të qëndrojë në burg për 45 ditë.
Seanca e sotme u zhvillua me dyer të mbyllura, ndërsa prova më e fortë e SPAK është dëshmia e Enver Jamakut.
Në sajë të këtij operacioni policia dhe SPAK goditën 18 baza armatimesh dhe sekuestruan një arsenal të sofistikuar armësh. Gjithashtu në sajë të këtij operacioni u zbardhën edhe tre ngjarje kriminale. Më konkretisht janë zbardhur ngjarja e vendosjes se tritolit ndaj Artian Bylyku, i cili eshte kunati i Domart Konjarit.
Gjithashtu, është zbardhur dhe ngjarja ku është qëlluar me armë avokati Paulin Papleka.
Ndihmesë në zbardhjen e ngjarjeve ka dhënë dëshmia e të penduarit të drejtësisë Enver Jamaku, i cili bashkëpunoi me hetimin pas arrestimit për tritolin në makinën e Xhon Menës.
Burime nga Policia thanë se në pranga janë vënë edhe persona që autoritetet i konsiderojnë lidhje të shtetasit Gjergj Cukali, ky i fundit tashmë në akuzë për grup kriminal nga SPAK.
