Ish-Drejtori artistik i Teatrit Kombëtar të Greqisë, Dhimitri Linjadhi, denoncohet nga një djalë i ri se e ka përdhunuar. Ky është denoncimi i tretë i ngjashëm ndaj aktorit të njohur grek.
Djali 27 vjeçar denoncoi në policinë e Athinës se kur ishte i mitur, 17 vjeç, ishte përdhunuar nga aktori Linjadhi. Këtë pohim, i riu e bëri para prokurorit në Athinë.
Djaloshi tha se nuk e njihte personalisht aktorin, por u përball në shesh me të. Ai tha se aktori e kishte ftuar në shtëpinë e tij dhe ai shkoi pa menduar se do të ndodhte diçka e tillë.
Sakaq, aktori grek gjendet në burg pasi mbi të po rëndojnë edhe dy akuza të tjera përdhunimi nga dy djem.
Për hetuesit është domethënës fakti që edhe një djalë tjetër denoncoi të njëjtën skemë: Aktori i njohur e ndali në sheshin pranë shtëpisë, e uli për kafe dhe më tej e bindi të shkojnë në banesën e tij dhe më pas e përdhunoi.
Në të gjitha rastet sipas denoncimeve, aktet shoqëroheshin me avuj alkooli dhe lëndësh narkotike.
Ndërkohë një tjetër dëshmi vjen nga aktori 29 vjeçar A.M. Ai ishte thirrur si dëshmitar nga vetë aktori, por seanca gjyqësore mori kthesë kur 29 vjeçari deklaroi se edhe ai ishte përdhunuar nga Linjadhi e për më tepër kishte parë djem 14-15 vjeçarë në shtëpinë e tij në Itakë.
Aktori i ri tha se ka qenë në Itakë në verën e vitit 2015 me regjisorin dhe aktorin Linjadhi. Po ashtu denoncoi ish drejtorin artistik të Teatrit Kombëtar kur tha se e kishte çuar dhe në hotelin në Epidaurus, për të njëjtin qëllim, abuzimin seksual.
Aktori 29 vjeçar tha se më 2010 kur ishte 18 vjeç, u takua me Dimitris Lignadis, si mësues i tij në shkollën e aktrimit “IASMOS”.
Që në mësimin e parë, i akuzuari iu afrua, duke i thënë se sa i veçantë është dhe i kërkoi të shkonte në banesën e tij ku dhe ndodhnin ato gjëra.
Ai më pas dëshmoi se Lignadis, nga njëra anë, filloi të tregonte se ai kujdesej për të, duke marrë rolin e mentorit, dhe nga ana tjetër, vazhdimisht i bënte presion që të linte të dashurën e tij dhe të ishte ekskluzivisht me të.
Autoritetet thonë se janë në pritje të denoncimeve të tjera të mundshme për aktorin 54 vjeçar.
