Janë zbardhur dëshmitë e punonjësve të pranishëm gjatë rënies së zjarrit në magazinën në pronësi të një qendre tregtare, katër ditë më parë, ku humbi jetën shefi i rojeve të sigurisë, Arjan Sala.
Në dosjen hetimore te siguruar nga TCH, të parët që kanë konstatuar zjarrin janë dy punonjës të magazinës pasi po prisnin një kamion me mallra që do të vinte dhe do ta shkarkonin në magazinë.
Ata kanë qenë të parë që kanë konstatuar tymin që dilte nga grilat nëntokësore.
Edhe pse kanë vepruar që të fikin zjarrin me bombol, ata kanë rrezikuar të asfiksohen, për këtë shkak kanë dalë me vrapë jashtë.
Pikërisht në këtë çast ata kanë vënë re një person të sigurisë së brendshme, I cili po vraponte për në brendësi të objektit.
Ky person ka qenë pikërisht i ndjeri Arjan Sala, i cili po hynte në magazinë me një bombol të madhe në krah.
Që nga ky moment askush nuk e kanë parë më Arjan Salën duke dale nga objekti.
Magazinieri Ndriçim Kasa ka sqaruar para grupit hetimor se shkak i zjarrit ka qenë një dritë neoni, ndërsa së bashku me magazinierin tjetër, Elton Haxhillari, përjashton mundësinë që të ketë rënë për shkak të shkëndijave të energjisë elektrike.
“Kolegu që ka kamerat në telefon na njoftoi se në magazinë ka rënë zjarr pasi kishte parë kamerat nga telefoni. Në këtë moment, zbritëm, pamë se po dilte tym dhe flakë në qendër të magazinës. Në këto kushte, morëm dy bombola fikëse zjarri që ishin në magazinë dhe u munduam të shuanim zjarrin, por gjatë shuarjes, flaka u bë më e madhe dhe u thye një neon. Pastaj u mbush gjithë ambienti në tym e flakë dhe ne dolëm jashtë. Duke dalë nga magazina pamë një person që hyri me një bombol të madhe zjarri për shuarje. Personin nuk e njihnin, por pamë që ishte punonjës i brendshëm i sigurisë me kostum blu dhe këmishë. Unë dyshoj se zjarri mund të jetë shkaktuar nga energjia elektrike neone pasi kanë qenë të vjetra. Ne nuk e kishim stakuar energjinë elektrike pasi do të ktheheshim përsëri në magazinë për të shkarkuar mallin që do të vinte. Në ambientet e punës, absolutisht nuk lejohet cigarja dhe asnjë punëtor nuk pi cigare brenda magazinës”, tha Kasa, thuhet në dosjen që gazetarja Anila Hoxha disponon.
Ndërsa administratori Altin Hysa, i cili kishte me qera magazinën që u përfshi nga zjarri ka deklaruar se nuk ka qenë prezent në momentin e ngjarjes dhe është njoftuar nga punonjësit e tij. Sa i përket masave të sigurisë në raste zjarri, ai ia la përgjegjësinë qiradhënësit duke thënë se në magazinë kanë qenë të montuara një numër i konsiderueshëm bombolash anti zjarr.
Gjithashtu shton se vetë ai ka vendosur një bombol të madhe të lëvizshme, të cilën e ka marrë me qera dhe e ka vendosur në ambientet e magazinës.
Ndërkohë pronari i qendrës, në dosjen që disponon gazetarja e Top Channel Anila Hoxha, Pëllumb Alimadhi, i cili është edhe qiradhënësi i magazinës nuk ka dhënë detaje për ngjarjen pasi ishte i rënduar psikologjikisht dhe ka kërkuar një kohë tjetër që do të pyetet.
Grupi i hetimit thotë se pritet të përcaktohet nëse mungonin pajisjet anti zjarr për menaxhimin e flakëve që u vunë nën kontroll pas 3 ditësh dhe u nxor trupi i pajetë i Arjan Salës, i cili u shpall “Dëshmor Kombi” pasi bëri të mundur shpëtimin e rreth 25 punëtorëve nga magazina.
