Shfaqje brutale kundër ligjit dhe rregullave, e ka cilësuar Kryeministri Edi Rama, mitingun e hapjes së fushatës elektorale të PD-së.
Rama tha se të mbledhësh 4 mijë veta në një shesh në kohë pandemie është jo thjesht shkelje e një ligji, është rrezik potencial për shëndetin e atyre njerëzve.
“I lanë 1 orë në pritje, pastaj i lanë edhe 1 orë të dëgjonin fjalimet, dhe unë uroj që asnjë nga ata njerëz të mos përfundojë në spital. Është skandal anti-njerëzor. Kush e bën këtë nuk duhet të konsiderohet fare si mundësi për të qeverisur vendin”, tha Rama në emisionin Opinion.
Sipas tij, ajo që ndodhi në mitingun e PD ishte si një “Covid center”.
“Dëgjova teorinë se fushata po bëhet si ajo e Joe Biden. Po Biden i mblidhte njerëzit me makina në parkingjet e mëdha dhe njerëzit rrinin në dyert e makinave të tyre nuk bashkoheshin bashkë kokë më kokë”, tha Rama.
