Janë luajtur ndeshjet e para të fazës eliminatore të Botërorit Katar 2022. Belgjika dhe Portugalia e nisin mbarë teksa fitojnë ndeshjet e tyre në shtëpi.
“Djajtë e Kuq” të Martinez triumfuan 3-1 në shtëpi kundër Uellsit të Gareth Bale. Skuadra mike kaloi e para në avantazh në minutën e 11-të. Harry Wilson finalizoi një kundërsulm shumë të bukur të Uellsit, gol që zgjoi nga gjumi vendasit.
Kevin De Bruyne dhe Thorgan Hazard përmbysën disavantazhin brenda 6 minutave, ndërsa Romelu Lukaku vulosi suksesin e Belgjikës me një penallti të kthyer në gol në pjesën e dytë.
Portugalia mundi minimalisht Azerbajxhanin falë një autogoli të Medvedev në minutën e 36-të.
Nga ana tjetwr Ukraina frenon kampionët në fuqi të Francës në Paris. Antoine Griezmann realizoi një eurogol në minutën e 19-të. Sallakja e sulmuesit të Barcelonës përfundoi në trekëndësh, por djemtë e Andriy Shevchenkos nuk u dorëzuan dhe evituan disfatën. Ukraina pati edhe fatin me vete në minutën e 57-të, moment kur Presnel Kimpembe, mbrojtësi i PSG-së, shënoi një autogol në portën e tij.
