Një krizë ka përfshirë politikën australiane, pas publikimit të një videoje që tregonte pjesëtarë të stafit që kryenin akte seksuale në parlament.
Një ndihmës i lartë është shkarkuar nga posti. Në një video, shihej pikërisht ky ndihmës, që kryente një akt seksual mbi tryezën e punës së një kolegeje femër. Kryeministri Scott Morrison, i cilësoi videot të turpshme.
Kjo vjen pasi një ish pjesëtare e stafit tregoi se ajo druhej se do të humbiste vendin e saj të punës pas një agresioni seksual nga një pjesëtar i stafit. Brittany Higgins, tha se ajo ishte përdhunuar nga një koleg në një zyrë, në mars 2019, por asaj iu bë presion që të mos raportonte incidentin në polici.
E gjithë kjo ndezi një valë akuzash dhe javën e kaluar, mijëra vetë morën pjesë në marshime proteste kundër abuzimeve seksuale dhe ngacmimeve mbi gratë në Australi.
Videot më të fundit i shkuan mediave australiane nga një ish anëtar i stafit qeveritar që thuhet se është bërë imun ndaj tyre për shkak të volumit të madh që kishte parë.
Përveç videove, të filmuara dy vite më parë, ai tha se njerëzit kishin përdorur edhe dhomën e lutjeve për marrëdhënie seksuale e kishin sjellë madje edhe punonjës seksi në parlament. Ky person i brendshëm foli për një kulturë në të cilën burrat mendonin se mund të bënin gjithçka që donin, duke i quajtur madje kolegët e tij, të falimentuar moralisht.
