Deputeti i Partisë Demokratike Flamur Noka është shprehur se përjashtimi për 10 ditë nga Kuvendi që vendosi Byroja është bërë me urdhër politik. Dhe për këtë Noka fajëson Kryeministrin Edi Rama.
Në një intervistë në ‘Ora News’, deputeti demokrat thotë se sjellja e tij ndaj Tahirit për të cilin dhe u përjashtua me 10 ditë, është pak përballë një qeverie trafikantësh.
Flamur Noka: Përjashtimi sot u komunikua si një përjashtim me urdhër politik sepse sapo filloi seanca zoti Balla komunikoi që “ne kemi marrë vendim, grupi i PS, që do të përjashtohesh zoti Noka”.
Ata mund të duan të na përjashtojnë përgjithmonë, por nuk është fatmirësisht në dorën e tyre. Sa i përket degradimit të Parlamentit, personi i parë që ka bërë gjithçka, që ka investuar gjithçka që të degradojë ai parlament, quhet Edi Rama. Degradimi i parlamentit është kur ti fut vrasës, përdhunues, trafikantë në parlament. Është shkatërrim i parlamentit. Shkatërrimi vazhdoi me tej kur Kryeministri në vend që të parashtrojë platforma apo programe apo të japë llogari në parlament për zbatimin e programit apo platformave të partisë tij dhe qeverisë së tij. Ka tre vjet, vazhdon dhe krahasohet me qeverisjen tonë, nuk është në gjendje të thotë asgjë dhe pastaj duke u ndodhur zbuluar, vazhdimisht fyen, shan opozitën. Ne nuk të pranojmë as këtë lloj gjuhe të poshtërimit, as nuk mund të njohim gjuhën e nënshtrimit.
Është kjo gjuha e duhur?
Noka: Është pak ndaj kësaj qeveri banditësh, kriminelësh, trafikantësh, me një Kryeministër mashtrues ordiner.Edhe veprimet duhet të shkallëzohen, PD për mua dihet ti përshkallëzojë të gjitha këto që po them unë. Nuk ka bashkëjetesë. Është vështirë të perceptoni se në çfarë gjendje është sot ky shtet, varfëri gjithandej, skamje gjithandej, krim, drogë, avionë droge, pista droge, policia dhe Ministria e Brendshme të inkriminuar, i gjithë shteti i inkriminuar. Nuk po flasim për ndikim bandash, por banda të qeverisë, është më keq. Ka një arrogancë të frikshme.
Përplasja me Tahirin tek “Siguria”, Noka: Ministër çapaçul
Noka: Karagjozllëk, a thua se ishte një kloun në një cirk, Ministri i Brendshëm 5 minuta me një zhargon të denjë për cirqe vazhdoi të tallej, ironizonte dhe poshtëronte Komisionin e Sigurisë dhe deputetët. Në rast se e majta ka deputetë në grup që pranojnë të nënshtrohen, poshtërohen dhe të fyhen publikisht, opozita nuk mundtë pranojë. Jemi aty për të përcjellë zërin e qytetarëve. Ishin gjëra që u panë publikisht. Rasti i Tahirit duke ikur në mënyrë të tillë, duke u tallur, prisnim të diskutonim për buxhetin. Fatkeqësia është se nuk u ndëshkua ai që poshtëroi parlamentin, është precedent shumë i rrezikshëm, mospërfillja, arroganca dhe dhuna që i bën qeveria Kuvendit është kërcënim i rëndë për demokracinë. Legjislativi është mbi ekzekutivin. Ai u soll sikur ne ishim fajtor për gjendjen e rëndë të sigurisë në vend. Mund ta shoh kush atë si Ministër?
Unë jo, nuk mund ta duroj. I kam bërë disa herë ndërhyrje kryetarit të Komisionit, derisa pashë se kryetari i Komisionit ishte në një çanak me Ministrin, ishin ortakë të një horlliku që u servirej qytetarëve. Ju siguroj që pavarësisht zhargonit pak të rëndë, vazhdimisht 100 herë të përjashtohem, 100 herë të shkel aty, do shkoj deri aty sa nuk do ta lë të dalë, e ka detyrë të japë llogari aid he çdo qytetar. Kur shohin një Kryeministër arrogant me deputetët dhe legjislativin, edhe Ministrat, megjithëse çapaçul, mundohen të sillen arrogantë nën petkun e pushtetit. Kjo në demokraci është e papranueshme.
