Nga Boldnews.al
Një nga zonat e preferuara të oligarkëve, është padyshim Durrësi. Afërsia me Aeroportin e Rinasit apo me Portin e ka bërë periferinë e Durrësit mjaft atraktive për biznesmenë të fuqishëm, brenda apo jashtë vendit, për investime. Qindra hektarë janë vënë disa herë “në shitje” për vetëm 1 euro, ndërsa në Spitallë kanë filluar edhe lulëzimet e para të bizneseve. Dhe, vetëm 10 ditë para zgjedhjeve parlamentare të 25 prillit, vetë Edi Rama do të japë me koncesion për 99 vjet rreth 50 hektarë në këtë zonë. Akuzat e mëparshme se pas këtij koncesioni qendron vëllai i tij Olsi, duket se do të faktohet në datën 15 prill, kur në ambientet e Ministrisë së Financave do të hapen zarfet e ofertave për këtë zonë ekonomike.
Koncesioni 99 vjeçar!
Në buletinin e radhës të Agjencisë së Prokurimit Publik, diku nga fundi, Ministria e Financave është munduar që të “fshehë” njoftimin për këtë koncesion. Në heshtje totale për mediat, ministria ka urdhëruar dhënien e kësaj sipërfaqe me koncesion. Dhe, gjithçka, vetëm 10 ditë para zgjedhjeve të 25 prillit! BoldNeës ka siguruar dokumentet e këtij koncesioni, i cili ka si objekt “ndërtimi, zhvillimi, mirëmbajtja dhe operimi i Zonës së Teknologjisë dhe Zhvillimit Ekonomik, në Spitallë, Durrës”.
Kohëzgjatja e kontratës do të jetë 99 vite, ndërsa Spitalla ndodhet në veri të Qytetit të Durrësit. “Sipërfaqja prej 49.1 ha i përket zonës kadastrale nr. 8517. Zona shtrihet në afërsi me Portin e Durrësit, më të madhin dhe më të rëndësishmin në Shqipëri, pranë qytetit të dytë për nga zhvillimi ekonomik në Shqipëri, Durrësit, vetëm 30 km larg Aeroportit Ndërkombëtar “Nënë Tereza”, 37 km nga kryeqyteti i Shqipërisë, Tirana” thuhet në këto dokumente, të cilat për mba përmbajtja (përveç sipërfaqes) janë “copy paste” me njoftimet e mëparshme.
Fituesi duhet që të paraqesë edhe një sigurim të ofertës prej 15,000,000 lekë. Mësohet se procedura konkurruese është me aplikim, në pronë private, ndërkohë janë edhe disa kritere për fituesit. Sipas ministrisë, kriteret janë propozimi teknik për ndërtimin e zonës, ndikimi mjedisor, social, koha e përfundimit të investimit kapaciteti financiar dhe mundësia e financimit të projektit.
10 ditë para zgjedhjeve!
Në dokumente thuhet se Institucioni Përgjegjës që duhet të specifikojë pikët për çdo kriter vlerësimi të vendosur, është Ministria e Financave. “Afati kohor për dorëzimin e ofertave ose kërkesave për pjesëmarrje është data 15.04.2021, ora 10.
Ofertat do të hapen në ambientet e Ministrisë së Financave, salla e mbledhjeve në katin e katërt. Periudha e vlefshmërisë së ofertave do të jetë 150 ditë” thuhet në këto dokumente. Pra, në kulmin e fushatës elektorale, Edi Rama do të “shesë” një pjesë të territorit shqiptar për vetëm 1 euro! Dhe, shqiptarët do të kenë në vëmendje luftën e atyre ditëve apo edhe rezultatin e zgjedhjeve.
