Vangjel Dule është në listën e kandidatëve për deputet nga opozita për Tiranën në vendin e 11-të. Në emisionin “Zonë e Lirë”, Dule ka reaguar pas përplasjeve që ka pasur me kryeministrin Rama ditët e fundit.
“Z. Rama më është qepur me bukë në trastë. Ishte në Sarandë dhe mbajti disa fjalime, ku objekti i sulmit isha unë personalisht. Kam hequr dorë nga përgjigjet me të. Kjo është një situatë klimike dhe unë nuk kam mundësi ta përballoj”, tha Vangjel Dule.
Lidhur me bullizmin e Kryeministrit ndaj kandidatëve të opozitës, Dule tha se kjo dëshmon gjendjen emocionale dhe ajo është gjendja e panikut.
“Unë kam preferuar që ta përballoj në Parlament, ndërsa ai preferon të më përballojë me monologje. Ai preferon që të sulmojë kundërshtarët e tij në praninë e njerëzve të vet apo në studiot si ajo që po xhiron kohët e fundit.
Në këto kohë, kundërshtari i Ramës është Basha. Ai shmang me çdo kusht ballafaqimin me Bashën. Më e rënda ka qenë kur humbi me Bashën në vitin 2011. Është aspekti më negativ në jetën e një politikani.
Ai nuk është i përgatitur për humbje. Unë besoj se njerëzit e mendueshëm janë të gjithë shumë të zhgënjyer. Në vlerësimin e tyre, figura e tij është e fundosur. Qytetarët duhet të distancohen, ne kërkojmë një shtetar në këto zgjedhje”, tha Vangjel Dule.
