Të tjera detaje dalin në pah nga vrasja e 34-vjeçarit Nelgert Pata në Fier dhe plagosja e shokut të tij.
Nga informacionet e siguruara nga grupi hetimor që po punon për zbardhjen e ngjarjes është mësuar se, Pata kishte marrë masa ekstreme për t’u vetëmbrojtur.
Në hotelin ku qëndronte 34-vjeçari, Policia ka gjetur një automjet të blinduar që përdorej nga Pata për të lëvizur. Por, ekzekutimi i Patës ndodhi në një automjet tjetër tip “Volksvagen”.
Ndërkohë, “News24” raporton se, brenda automjetit të blinduar janë gjetur dy kallashnikovë që Pata i mbante për t’u mbrojtur. Lidhur me dyshimet se, 34-vjeçari mund të jetë nxjerr në pritë për t’u ekzekutuar nga dy persona me maska që derdhën mbi trupin e tij 30 plumba, hetuesit kanë zbuluar nga tabulatet telefonike se Pata dhe Ari Alinani që ndodhej në automjet në momentin e e ekzekutimit kishin njohje të mëparshme. Gjë e cila mësohet nga bisedat telefonike mes tyre.
