Ka nisur këtë të Enjte seanca në KLGJ për gjyqtares Enkeleda Hoxha, për të cilin ILD kërkon shkarkimin nga detyra.
Sipas raportit hetimor të ILD, gjyqtarja e Krujës ka dhënë 6 vendime në harkun kohor të maj 2017 – nëntor 2019 që përbëjnë akte që diskreditojnë figurën e gjyqtarit.
Inspektori i Lartë i Drejtësisë, Artur Metani deklaroi se rezulton e provuar që:
-Nga ana e magjistrates Enkeleida Hoxha janë ndërmarrë veprime/mosveprime të cilat kanë të bëjmë me mosrespektim të rëndë dhe të vazhduar të legjislacionit material dhe procedural penal
-Nga ana e magjistrates Enkeleida Hoxha, nuk janë marrë prova vendimtare për zgjidhjen e çështjes duke cënuar parimin e paanësisë së gjykimit
-Nga ana e magjistrates Enkeleida Hoxha i është atribuar dhënia e cilësive të ndryshme, herë si i paraburgosur dhe herë si i dënuar, gjatë periudhave të njëjta në funksion të pranimit të çdo kërkese të paraqitur nga ana e të njëjtit kërkues;
-Nga ana e magistrates është aplikuar ulja e njëkohshme e dënimit për periudha më të gjata se periudha 12 mujore e vlerësimit të parashikuar në Ligjin nr. 8328/2008 “Për të drejtat dhe trajtimin e të dënuarve dhe të paraburgosurve”, i ndryshuar.
-Nga ana e magistrates nuk janë respektuar kriteret ndaluese për përfitim amnistie
-Në 5 procese gjyqësore është konstatuar një mungesë thelbësore në arsyetimin e vendimeve gjyqësore
-Arrihet në konkluzionin se veprimet/mosveprimet e ndërmarra nga ana e magjistrates Enkeleida Hoxha janë aq serioze sa kanë cenuar vlerat themelore të saj; besimin që magjistrati duhet të përcjellë te publiku në përmbushjen e misionit dhe rolit të tij në dhënien e drejtësisë; kanë diskretituar rëndë figurën dhe pozitën e gjyqtarit dhe kanë ulur dinjitetin e organit që përfaqëson duke e bërë atë të pa denjë për vazhdimin e ushtrimit të funksionit të magjistratit.
Ai kërkoi nga KLGJ shkarkimin nga detyra të gjyqtares.
Pritet paraqitja e konkluzioneve të mbrojtjes dhe vendimi përfundimtar i KLGJ për gjyqtaren Hoxha, e cila këtë mëngjes u shoqërua me efektivë policia nga qelitë e paraburgimit në seancë.
Aktualisht, Enkelda Hoxha ndodhet nën masën e arrestit me burg, pas arrestimit për korrupsion.
