Makjazhi nuk e shpëton Edi ramën nga humbja më 25 prill. Kështu u shpreh kreu demokrat Lulzim Basha, ndërsa u pyet në konferencën për mediat lidhur me kandidimin në krye të listës së PS për Qarkun e Tiranës të inxhinieres Luljeta Bozo dhe shefes së Infektivit, Najada Çomo.
“Nuk ka asgjë ta shpëtojë Edi Ramën nga ndëshkimi me votë në 25 prill, nuk ka rëndësi kush është në listën e Ramës, ka rëndësi për të kuptuar se nuk ndahet dot nga krimi dhe ata që ka vjedhur këto 8 vite. Por sado makijazh të hedhë shqiptarët e kuptojnë, pa larguar Edi Ramën nuk ka ndryshim. Ndihet dhe shihet kudo, e kupton çdokush” tha ai.
Ndërkohë i pyetur për moskandidimin e 15 ish-deputetëve të grupit parlamentar të PD-së, Basha tha se nuk janë 15 por qindra, referuar kvshtu numrit të kandidatëve që u propozuan nga baza e PD.
“Nuk mungojnë 15 por qindra njerëz që janë pjesë e ekipit që do të ndryshojmë Shqipërinë pas 25 prillit. Vetëm për programin janë angazhuar mbi 500 specialistë të fushave të ndryshme. PD është e gatshme, përgatitur për ta bërë planin që kemi shpalosur. Janë të gjithë ata që kanë kontribuar dhe do të vazhdojnë nëse janë në grup, ekzekutiv apo detyra të tjera” tha ai.
