Tre persona kanë mbetur të plagosur nga sherri i ndodhur këtë të Hënë në Kavajë, ku u përdorën dhe armë zjarri.
Ngjarja ndodhi në fshatin Sinaballaj, rreth orës 11:50.
Policia njoftoi se si pasojë e një konflikti të çastit për motive të dobëta, fillimisht me sende të forta dhe më pas duke përdorur armë zjarri, dyshohet se janë plagosur me armë zjarri Ervin Juba, 27 vjeç dhe Klajdi Lluca, 22 vjeç.
Po ashtu, është dëmtuar me sende të forta Jurgen Juba, 24 vjeç.
Të tre ndodhen në spital, nën kujdesin e mjekëve.
Grupi hetimor ndodhet në vendngjarje dhe po punon për sqarimin e plotë e rrethanave të ngjarjes, shtuan të njëjtat burime.
