Shefja e Departamentit të Sëmundjeve Infektive në Institutin e Shëndetit Publik, Silva Bino, e konsideroi rritjen e numrit të infeksioneve me COVID në vend si një “kambanë alarmi”, ndërsa nuk përjashtoi mundësinë e ashpërsimit të masave.
Për “abc news”, Bino u shpreh se situata po monitorohet dhe të hënën do të merren masat përkatëse, sipas evoluimit të epidemisë.
Ajo u bëri apel qytetarëve që të respektojnë masat, të shmangin grumbullimet, të mbajnë maskën dhe të evitojnë kafenetë, duke i konsideruar burim infeksioni.
“Në fund të javës dhe të hënën tjetër ne do të shikojmë se si po ecën gradualisht situata dhe do të merren masan përkatëse sipas evoluimit të pandemisë. Me rëndësi është që të gjithë njerëzit të evitojnë grumbullimet, të mbajnë maskën, të ulen shpesh në kafene apo lokale në mënyrë të grumbulluar, pasi janë vende të burimit të infeksionit. Është një situatë serioze, pasi numri i lartë i rasteve, i të shtruarve në spitale të cilët mund të përfundojnë në intubim, janë një kambanë alarmi dhe shqetësuese”, tha Bino.
