Shkurti është zakonisht muaji që shënon kulmin e sezonit të gripit, periudhë kur qendrat shëndetësore dhe spitalet mbushen plot me pacientë. Por jo këtë vit.
Praktikisht në Shtetet e Bashkuara gripi është zhdukur. Të dhënat që vijnë janë në nivele shumë më të ulëta se gjithçka që është shënuar ndër dekada.
Ekspertët thonë se masat e vendosura për të shmangur koronavirusin siç janë vendosja e maskave, distancimi fizik dhe mësimdhënia në distancë janë disa faktorë të rëndësishëm në parandalimin e një “tëindemic” një epidemie e pandemie të dy sëmundjeve të ndryshme (gripit dhe COVID-19) që ndodhin në të njëjtën kohë.
Ekspertët thonë se mund të ketë ndihmuar edhe nxitja që u bë për një vaksinim kundër gripit në masë sikurse ulja e numrit të personave që udhëtojnë.
Koronavirusi në thelb e ka “mundur” gripin e viruse të tjera që janë më të zakonshme në vjeshtë dhe dimër. Shkencëtarët nuk e kuptojnë plotësisht mekanizmin që qëndron pas kësaj. Por sipas doktor Arnold Monto, ekspert në Universitetin e Miçiganit kjo është e njëjta gjë që ndodh me atë çka vihen re kur variante të caktuara të gripit mbizotërojnë mbi të tjerët.
Lynnette Brammer e Qendrave Amerikane për Kontrollin dhe Parandalimin e Sëmundjeve thotë se në shkallë kombëtare “ky është sezoni me numrin më të ulët të rasteve me grip që kemi regjistruar”, sipas një sistemi mbikëqyrjeje që është rreth 25 vjeçar.
Në Qendrën Mjekësore Maine në Portland, spitali më i madh i këtij shteti, doktor Nate Mick, kreu i departamentit të urgjencës thotë se “këtë dimër ka patur zero raste të dokumentuara të gripit”.
Po kështu në kryeqytetin e Oregonit, në Spitalin Salem, nuk kanë regjistruar asnjë rast me grip.
“Kjo është një gjë shumë e mirë”, thotë doktoreshë Michelle Rasmussen.
Shifrat janë të habitshme duke marrë parasysh se gripi ka qenë prej kohësh kërcënimi më i madh në vend nga një sëmundje infektive. Në vitet e fundit regjistroheshin 600 mijë deri 800 mijë shtrime vjetore në spital si pasojë e gripit dhe 50 deri 60 mijë vdekje.
Në të gjithë globin, prekja nga gripi ka qenë në nivele shumë të ulëta sikurse në Kinë, Evropë dhe gjetkë në Hemisferën Veriore. Kjo pason njoftimet për raste të pakta në Afrikën e Jugut, Australi dhe vende të tjera gjatë muajve të dimrit.
Por situata natyrisht ka qenë ndryshe për sa i takon koronavirusin, i cili u ka marrë jetën më shumë se 500 mijë njerëzve në Shtetet e Bashkuara që prej fillimit të pandemisë. Infeksionet e reja si dhe numri i vdekjeve arriti nivele të reja rekord në dhjetor dhe janar, para se të pësonin rënie. /voa
