PDIU dhe PD kanë zyrtarizuar marrëveshjen për të qenë pjesë e koalicionit “Shqipëria Fiton” në zgjedhjet e 25 prillit. Pas marrëveshjes së firmosur në selinë e PD, kreu i PDIU, Shpëtim Idrizi, tha se kjo aleancë është kundër 1 personi të vetëm që po kthehet në Sulltanin e Shqipërisë.
“Nuk jemi në aleancë kundër ndonjë formacioni, por kundër 1 personi, Edi Ramës, që 5 oligarkëve po i jep porte e aeroporte, çdo tender e koncension.
Edi Rama është kthyer në një Sulltan. Nuk kanë rëndësi fare mandatet që do të ketë PDIU në Kuvendin e ardhshëm, por ne do e ndihmojmë koalicionin Shqipëria Fiton me 40 apo 50 mijë vota”, tha Idrizi.
Ai shtoi se Edi Rama erdhi në pushtet si një flamurtari çështjes çame, ndërsa sot qan më shumë për Greqinë se vetë grekët.
