Është publikuar në profilin zyrtar të Federatës Portugeze të Futbollit në “Facebook” pamjet filmike të regjistruara në mënyrë amatoreske nga videokamera e një telefoni, që dokumentojnë fjalimin e Cristiano Ronaldos përpara shokëve dhe drejtuesve të përfaqësueses portugeze. Luzitanët sapo kanë fituar finalen e Kampionatit Europian, duke mundur Francën.
“Dua të falenderoj këtë burrë këtu (i drejtohet trajnerit). Pikë së pari, pa atë asgjë nga këto nuk do të kishte qenë e mundur. Së dyti, të gjithë futbollistëve dhe stafit, gjithëkush i përfshirë në këtë arritje.
Askush nuk besoi te Portugalia, por e vërteta është se ne ja dolëm. Të gjithë ne. Ne ja dolëm. Unë jam shumë i lumtur.
Kjo është një nga ditët më të bukura të jetës time.
Harrojini trofetë individual, Champions League, ky këtu tani është momenti më i bukur i jetës time.
Deri tani kam qarë të paktën 3 apo 4 herë. Vëllait tim iu desh të më thonte që të qetësohesha. Dhe unë i thashë: Hugo nuk mundem. Është e vërtetë nga thellësia e zemrës time. Betohem për jetën e djalit tim. Jam shumë shumë, shumë I lumtur. Mund ta përsëris këtë gjë 100 herë të tjera. Jam shumë i lumtur. Ky është trofeu që mungonte. Falë të gjithë jush, futbollistëve dhe gjithë stafit dhe sërish ju trajner. I gjithë besimi që ju kishit, realisht më preku mua. Të gjithë stafit mjeksor, sigurisë, Joakin, Ricardo, Miguel, vëllait tim. Nga thellësia e zemrës time, jam vërtetë shumë i lumtur. Ne e meritonim këtë. Ne jemi tani në historinë e Portugalisë. Jemi ekipi i parë që e arrijmë këtë gjë”, përfundon fjalimi prekës i Cristiano Ronaldos.
