Ndeshja kryesore e javës së 20-të në Kategorinë Superiore është Kukësi-Partizani, takim që do të luajë ditën e diel në stadiumin “Elbasan Arena” ora 16:00.
Të kuqtë e drejtuar nga Ilir Daja kanë kryer ditën e sotme stërvitjen e radhës në orën 11:00. Lajmi i mirë për Partizanin është rikthimi nga pezullimi i Rron Brojës.
Mesfushori do të jetë gati ndaj Kukësit dhe trajneri Daja do ta ketë të plotë grupin e në fushë pritet të hedhë të gjithë “artilerinë e rëndë”.
Postimi i Partizanit:
Skuadra po zhvillon me intensitet të lartë përgatitjet në prag të përballjes me Kukësin. Seanca e sotme është zhvilluar në orën 11:30, si zakonisht në ambientet e kompleksit “Football Republic”. Nën urdhrat e trajnerit Daja dhe stafit teknik kanë qenë prezent të gjithë lojtarët. Për sfidën ndaj Kukësit grupi është i plotë, pasi i gatshëm është edhe mesfushori Ron Broja i cili rikthehet nga pezullimi. Përgatitjet do të vijojnë të premten me seancën e radhës në orën 11:30. Sfida Kukësi – Partizani e vlefshme për javën e 20 të Kategorisë Superiore do të luhet ditën e diel ora 16:00 në stadiumin “Elbasan Arena”.
