Pas një fillimi të vështirë të sezonit, Partizani ka surprizuar me perfomancat nën drejtimin e Ilir Dajës.Të kuqtë e nisën garë pa asnjë perforcim, megjithatë me trajnerin Ilir Daja në krye ia arritën të ishin në vendet e para duke qenë në garë për titullin kampion. Pjesa e dytë e sezonit pritet të jetë ndryshe, pasi kryeqytetasit kanë bërë afrime të goditura.
Një meritë të veçantë në ekipin e këtij sezoni padyshim që ka trajneri 54-vjeçar. Në një intervistë të dhënë për “Sport Neës”, Daja ndër të tjera ka treguar si është të punosh me presidentin Gaz Demi dhe drejtorin Olsi Rama.
Objektivat– Objektivat nuk kanë ndryshuar nga fillimi, pasi gjithmonë luftojmë për objektiva maksimalë. Gjithçka varej nga merkatoja e mbyllur dhe për këtë arsye nuk vendosëm objektiva, pasi e lamë ta vendosim rrugës. Nuk kemi hequr dorë as nga titulli as nga Kupa. Jemi në çerekfinalen e Kupës. Luftojmë në të dyja frontet dhe nuk mendojmë se çfarë do të ndodhë në fund. I marrim ndeshjet një nga një.
Rivalët– Janë shumë pikë në lojë dhe nuk mendoj se ka ndonjë ekip që është dorëzuar. Të gjitha ekipet e tjera janë aty-aty. Rivaliteti është aty. Nëse nuk ka shumë ekipe rivale, e ke të vështirë të rikuperosh. Përveç kësaj i jep mundësinë ekipeve që të mos heqin dorë deri në fund.
Marrëdhëniet me drejtuesit e Partizanit– Marrëdhëniet me Gaz Demin janë shumë te mira jo të shkëlqyera, sepse nuk mund ta them një gjë të tillë, por mos ta prishim këtë harmoni që kemi të gjithë së bashku. Kemi një president që investon prej shumë vitesh, Partizani investon shumë, gjithashtu është një person që të lë të punosh i qetë dhe nuk është i nxituar, të mirëkupton. Edhe me Olsi Ramën kemi marrëdhënie të mira, jemi te gjithë ditën bashkë me të dhe gjithë stafin, është person i mirë, të metën e vetme që ka është shumë më me edukatë se sa pjesa tjetër e komunitetit sportiv. Nuk ka ndërhyrje nga askush sa i përket formacionit.
