Rudina Magjistari është moderatorja e radhës e infektuar me Covid-19. Ajo e ka drejtuar emisionin e saj nga shtëpia ditën e sotme. Vetë Magjistari ka njoftuar se është infektuar me koronavirusin, duke iu shtuar listës së emrave të njohur të ekranit që janë prekur nga ky virus.
“Përshëndetje të dashur miq, sot ndryshe nga çdo herë tjetër në programin tonë, ju përshëndes nga shtëpia ime. Jam në një kënd këtu të improvizuar për të bërë një lidhje me ju drejtpërdrejt nëpërmjet Skype pasi e kisha të pamundur që sot të vija në studio. Pse do thoni ju, e nuk ka arsye tjetër përveç Covidit. Mesa duket ishte momenti për ta pasur unë radhën për të kaluar Covidin.
Në fakt me thënë të drejtën tamponin nuk e kam bërë ende, por simptomat janë bërë shumë të qarta, për më tepër që në familje, bashkëshorti im dje ka rezultuar me tampon me Covid kështu që duke presupozuar që mund ta kem dhe unë preferova të marr menjëherë masat, të izolohem dhe ndërkohë në ditët në vijim të bëj tamponin. Sigurisht që kam filluar mjekimin me mjekun infeksionit Gentian Stroni, kam qenë gjatë gjithë kohës në kontakt me të dhe kam rastin ta falenderoj dhe përshëndes sepse ka qenë gjithmonë i gatshëm për të më ndihmuar me këshillat dhe sugjerimet e tij.
Ne do të vijojmë gjatë kësaj periudhe të karantinimit tim herë pas here me lidhje të tilla por ndërkohë do të të sjellim për ju edhe programe të cilat ne i kemi regjistruar më herët dhe do i transmetojmë”, është shprehur Rudina Magjistari.
Situata pandemike në Shqipëri ka agravuar në javët e fundit, duke qenë se vendi po regjistron shifra rekord të infektuarish dhe vdekjesh, me mbi 1000 raste ditore dhe rreth 15 vdekje çdo ditë.
Edhe situata në spitale është gjithashtu mjaft shqetësuese, duke qenë se 550 shtretërit në 4 spitalet Covid janë ezauruar, dhe janë hapur dy spitale rajonale, ai i Durrësit dhe Shkodrës, për të pritur pacientë me Covid-19.
Një tjetër moderator që është infektuar kohët e fundit me Covid-19 është dhe Ardit Gjebrea, si dhe moderatorja Fjoralba Ponari, e cila u riinfektua së fundmi.
