Nënkryetari i LSI-së, Petrit Vasili, ka denoncuar një rast skandaloz, ku një paciente ka humbur jetën, në një kohë që nga familjarët e saj është bërë ç´është e mundur për ta transportuar drejt spitalit të Peshkopisë, që ndodhej 10 km larg.
Vasili tha se ky është një nga rastet e rënda që rrëzon propogandën e Qeverisë.
“Po ju tregoj përkundrejt propagandës së shëmtuar dhe të neveritshme të qeverisë në këto të vështira, më të ashtuquajturin ‘shërbim shëndetësor’ e me fotot e tyre propagandistike, se cili ka qenë realiteti dhe së bashku le të ndjekim videon.
Një video, e cila flet vetë se si vetëm rreth 10 kilometra nga Peshkopia, të rinj e të reja por edhe qytetarë të tjerë përpiqen me çdo kusht e me çdo mjet të çojnë një të moshuar për në spital, në gjendje shumë të vështirë shëndetësore, e pa ndihmuar, e pambështetur nga asnjë segment i shtetit. Dhe kjo e moshuar, për fat të keq, për mungesë të ndihmës mjekësore, humbet jetën.
Pra, humbet jeta 10 kilometra nga Peshkopia dhe asnjë mjet, asnjë lloj ndihme nga ana e shtetit, nga asnjë lloj forme, nuk i ofrohet dhe megjithëse qytetarët e shkretë bëjnë të pamundurën, me ç’ kanë në dorë, nuk ia arrijnë dot të shpëtojnë të moshuarën.
Përkundrejt kësaj, ju shikoni foto propagandistike, të cilat tregojnë mjekë që tregojnë mjekë që bëjnë sikur matin tensionin në borë, siç e shikoni, ja tek i keni fotot, të cilat janë të turpshme edhe nga ana profesionale. Shikoni që edhe stetoskopi i tyre vendosën në anë të krahut të pacientit, e ku një e moshuar, e cila do të maste tensionin, nxirret me triko në mes të dëborës, vetëm e vetëm për propagandë. Këto pamje, këto foto flasin më së miri se çdo gjë tjetër”, tha Vasili.
Referuar rasteve të deklaruara një ditë më parë me koronavirus, Vasili tha se u ulën testimet me 30 % për të fshehur gjendjen reale të pandemisë.
