Qeveria vazhdon me show-n e zakonshëm. Kreu i qeverisë Edi Rama u është përgjigjur kritikave të qytetarëve dhe akuzave nga opozita për menaxhimin e situatës së rrugëve nga dëbora që përfshiu vendin në fundjavë.
Duke u justifikuar për menaxhimin e situatës, Rama tregoi se çfarë ndodh në vendet e botës. Madje, edhe mburret se qeveria e tij ka punuar, e rrugët janë zhbllokuar në kohë rekord.
Edi Rama tha se edhe në SHBA, Greqi dhe vende të tjera stuhia ka shkaktuar probleme, duke lënë miliona familje pa drita dhe bllokuar rrugët.
“Para se të vija këtu pashë një raport, të familjeve që janë pa drita në SHBA tani që flasim nga dëbora, a e dini sa janë? Nuk ishin të gjitha shtetet në atë raport dhe 3 milionë konsumatorë familjarë pa drita.
Sigurisht nga stuhitë e dëborës këto gjëra ndodhin, ashtu sikur ndodh të bllokohen rrugët, pasi asnjë vend nuk ka shpikur mbulesë speciale për dëborën.
Asnjë borëpastruese deri më sot nuk ka arritur shkenca ta bëjë që ta mbledhë borën në ajër. Këtu ka pasur propozime që të hidhej kripë përpara se të binte dëbora. Athina besoj e patë gjendjen që ishte, bllokim nga të katërta anët” tha ai.
Edi Rama kishte një përgjigje edhe për veprimin e ministres Balluku që hipi mbi borëpastruese mbrëmjen e së shtunës. “Mund të kishte ndodhur edhe këtu që larg qoftë të kishte humbje jete, ndërkohë në Janar kërkoni sa jetë të humbura ka në vendet e BE-së.
Fatmirësisht nuk ndodhi asgjë e tillë. Por ama rrugët u zhbllokuan në kohë rekord. Sepse u puna. Ministrja në mes të dëborës dhe stuhisë futet në borëpastruese që të dëgjohet kur flet, këtu bëhet nami. Ndërkohë ajo e shpreh vetë, se thotë po hipi në borëpastruese se nuk dëgjohet. Të hipësh në borëpastruese është keq, të mos shkosh është keq”-tha ai.
