Partia Socialdemokrate është një nga subjektet që është regjistruar në KQZ në lidhje me zgjedhjet e 25 prillit. Ajo që ka tërhequr vëmendjen sot ishte fakti se në krye të kësaj partie nuk është Tom Doshi, por Engjëll Bejtja.
E ndërsa në dhjetor 2020, njoftohej zgjedhja e Tom Doshit si Kryetar i PSD, madje edhe objektivat për fitimin e 2 deputetëve në Qarkun Shkodër dhe 1 në Tiranë, dy muaj më pas, pra në shkurt 2021 rezulton se partia drejtohet nga Engjëll Bejtja.
Ai nuk është një emër i panjohur në politikën shqiptare, pasi ka qenë deputet, madje ka mbajtur edhe postet në PSD, qoftë të Sekretarit Organizativ, ashtu edhe nënkryetarit të kësaj partie, gjatë kohës që ajo drejtohej nga Skënder Gjinushi.
Engjëll Bejtaj është mjek në profesion dhe ka mbajtur postin e shefit te Shërbimit të Kirurgjisë, pranë Spitalit Universitar “Shefqet Ndroqi”.
Në qershor të 2019-ës, Gjinushi i drejtohej KQZ me një kërkesë, e cila është shqyrtuar dhe miratuar nga ky institucion.
“Për shqyrtimin e kërkesës për zëvendësimin e emrit të Kryetarit të Partisë Socialdemokrate të Shqipërisë z. Skënder Gjinushi”.
KQZ vendosi zëvendësimin e emrit të Kryetarit të Partisë Socialdemokrate të Shqipërisë, z. Skënder Gjinushi me emrin e personit të kooptuar, z. Engjell Bejtaj”, thuhet në njoftimin e KQZ-së.
Pra në qershor 2019, PSD kalonte nga Gjinushi te Engjëll Bejtja, ndërkohë që në dhjetor 2020, njoftohej zgjedhja e Tom Doshit.
Praktikisht dy janë mundësitë: ose Tom Doshi nuk ka njoftuar zyrtarisht zgjedhjen e tij si Kryetar i PSD, sikundër njoftohej mediatikisht në dhjetor 2020, ose për shkak të zhvillimeve të fundit politike, pas kërkesës së shprehur nga Ambasadorja amerikane Yuri Kim, duke monimuar emrin e Doshit, është rikthyer në skenë emri i caktuar nga Gjinushi, i cili sot mban postin e kreut të Akademisë së Shkencave.
