Mesfushori me tipare sulmuese i Laçit, Mentor Mazrekaj u shpreh në studion “Rubrikës Sportive” në “RTSH Sport” se favoriti për titull kampion mes Partizanit dhe Laçit do të vendoset nga sfida direkte mes tyre.
32-vjeçari shtoi se u habit me humbjen e Kastriotit 3-0 përballë Partizanit duke patur parasysh se krutanët janë ballafaquar më së miri me ekipet e forta këtë sezon, por çmoi forcën e të kuqve në zgjidhjen e ndeshjeve.
“Vllaznia – Vllazninë kanë filluar ta marrin seriozisht. Në fillim e sulmonin, tani po mbrohen. Prandaj e ka më të vështirë me ekipet. Por, ne kemi ndeshjet tona, shikojmë punën tonë.
Jam habitur si humbi Kastrioti, sepse është ekip që u ka shkaktuar të gjithëve probleme. Po ta shikosh kronikën, Partizani është në momentet më të mira të këtij sezoni. I zgjidh ndeshjet shpejt.
Partizani apo Laçi, pretendent për titull? Normalisht, kam dashuri për të dyja ekipet. Por, atje (Partizani) kam luajtur më shumë vite. Tani, jam te Laçi, jam këtu dhe po paguhem. Pretendenti për titull mes të dyve do të vendoset nga ndeshjet direkte”, u shpreh futbollisti i Laçit, Mentor Mazrekaj.
