Ministria e Arsimit njoftoi në fundjavë zhvillimin e mësimit online në sistemin parauniversitar nga data 15 deri në 19 shkurt. Vendimi u mor për shkak të kushteve të motit, temperaturave të ulëta dhe reshjeve të dëborës në pothuajse të gjithë territorin.
E këtu nuk ka asgjë të keqe po të mendosh se Ministria e Arsimit apo ministrja Evis Kushi ka menduar për mbrojtjen e nxënësve nga temperaturat e ulëta. Në fakt, kjo nxjerr zbuluar shumë nga kryebashkiakët dhe Qeverinë, e cila ka propoganduar ngrohjen në shkolla, veçanërisht ato të ndërtuara apo rikonstruktuara prej saj.
Nëse në bashkitë kryesore të vendit do të kishte realisht ngrohje, sikundër është propoganduar, atëherë mund të kishte një alternim mësimi, qoftë edhe me orë të shkurtuara, atje ku do të ishte e mundur.
Por jo, zgjidhja e gjetur ishte zhvillimi i mësimit online, pa menduar se a i kanë kushtet prindërit për tu mundësuar fëmijëve të tyre nga klasa e parë deri në vitin e 3-të të shkollës së mesme, të ndjekin mësimin online.
Një tjetër moment aspak i studiuar nga Ministria e Arsimit, edhe pse prej ditësh njoftohej përkeqësimi i motit, apo edhe situate e krijuar nga pandemia e Covid-19, ishte dhënia e një njoftimi përmes rrjeteve sociale, për vendimin, ndërkohë që vetë shkollat, qofshin publike ose jo, nuk kanë qenë të përgatitura për këtë lloj sistemi.
Kjo mësohet se nga një letër që Don Gino Martuçi, drejtor i shkollës Don Bosco, i ka drejtuar prindërve kur thotë “ndërsa i kuptojmë shumë mirë kërkesat e Ministrisë, por pasi e morëm këtë lajm vetëm të shtunën pasdite, me shkolla të mbyllura dhe me të gjitha dyqanet e mbyllura, kjo krijoi shumë vështirësi organizative dhe praktike edhe për ne që ishim të gatshëm për një mësim të mundshëm online”.
Sipas tij, vështirësia më e madhe është kalimi i njëkohshëm i të gjitha klasave online.
“Me nxënësit e shkollës së mesme mesme ishim në gjendje të aktivizonim mësimin online menjëherë, edhe pse ne u njoftuam vetëm pasditen e mëparshme.
Për të qenë më të saktë, vështirësia lind nga fakti se dëshira jonë është që mësimi në distancë të bëhet si duhet, duke respektuar të drejtën për arsimim të fëmijëve, por në të njëjtën kohë duke menaxhuar mirë kohën, në mënyrë që kjo përvojë të mos jetë shumë e rëndë, veçanërisht për nxënësit e fillores.
Sipas indikacioneve të ministrisë, pra, ne do të krijojmë një mesim autentik në distancë dhe jo dorëzimin të thjeshtë të materialit përmes Ëhatsapp.
Zbatimi i mësimit në distancë në këtë kuptim kërkon një kohë organizative si për ne, por edhe për shumë prindër që janë të lutur të jenë afër fëmijëve të tyre në menaxhimin e mësimit në distancë, veçanërisht nxënësit e fillores.
Mjafton të them se, për të siguruar mësim të mirë në distancë për të gjitha klasat, nevojiten 24 laptopë (një për secilën klasë) pa marrë parasysh që 15 të tjerë aktualisht janë në përdorim nga shkolla e mesme”, shprehet drejtori i shkollës.
Dhe referuar të gjithë problematikës si dhe kohës që duhet për të organizuar mësimin online, Don Gino Martuçi , shprehet se ditën e hënë me datë 15 Shkurt nuk do të ketë mësim për shkollën fillore dhe 9 vjeçare.
“Besoj se është shumë e nevojshme që gjërat të bëhen mirë që nga fillimi dhe më pas të vazhdohet normalisht, duke marrë parasysh që shkolla jonë ka siguruar vazhdimësinë e zakonshme dhe të plotë të mësimeve në muajt e fundit, duke mos humbur asnjë ditë shkollore.
Ne do të kishim vazhduar në heshtje si më parë, por përballë indikacioneve ministrore dhe emergjencave, të gjithë jemi thirrur të bashkëpunojmë”, shprehet ai në letrën që iu drejton prindërve.
Në fakt kjo nuk është hera e parë që Ministria e Arsimit por edhe Ministri të tjera marrin vendime të minutës së fundit, duke hequr përgjegjësitë nga vetja, dhe duke ia deleguar ato ose shkollave, ose prindërve.
Referuar shifrave të varfërisë në vend, mund të jenë me mijëra fëmijë të sistemit parauniversitar që mund të kenë vështirësi për të ndjekur mësimin online, jo nuk do të duan ata apo prindërit e tyre, por për shkak të kushteve ekonomike dhe sociale që jetojnë.
