Situata në spitalet Covid paraqitet e rënduar, ndërsa nga raportimet zyrtare 492 shtretër janë të zënë, ndërsa në total janë 550 shtretër në 4 spitale. Kjo do të thotë se të lira janë vetëm 58 shtretër, një situatë kjo që nuk është regjistruar as në muajt e parë të pandemisë.
Ndërkohë referuar shifrave zyrtare të një dite më parë nga Ministria e Shëndetësisë, 32 persona janë në terapi intensive, nga të cilët 19 të intubuar. Këto janë sërisht shifrat më të larta të deklaruara zyrtarisht nga Ministria e Shëndetësisë, lidhur me gjendjen e pacientëve në spitale, ndërsa mijëra të tjerë kurohen në banesat e tyre.
Bazuar në shifrat e deklaruara, duket se pandemia e Covid-19, në të paktën dy javët e fundit ka dalë jashtë kontrollit, dhe kjo sipas deklaratave zyrtare lidhet me mosrespektimin e masave, uljen e temperaturave dhe qëndrimin e qytetarëve për një kohë të gjatë në ambiente të mbyllura.
Tirana mbetet qarku dhe bashkia më e prekur përsa i takon numrit të rasteve, por në raport me numrin e popullsisë, shifrat e deklaruara zyrtarisht mbeten ende të vogla. Në Tiranë numërohen 19734 pacientë aktivë me Covid, nga 33897 raste aktive në total.
Ndërkohë numri i vdekjeve ka Covid ka arritur, sipas shifrave zyrtare në 1517 persona, ku sërisht Tirana ka numrin më të lartë.
