Nga BoldNews.al
Propaganda e ministreve, që dalin krah për krah me kryeministrin në inaugurime dhe inspektimet e punëve publike, ku herë pas herë futen në mes të pluhurit, baltës apo borës, është vetëm për televizionet dhe ERTV.
“Vuajtjet” e tyre, kur ndjekin nga pas kryeministrin dhe bisedojnë në ecje në mes të kantierëve të ndertimit, duket se është vetëm për shou. Ajo çfarë ndodh më pas është “sekret”.
Drekat, darkat, lëvizjet me automjete luksoze apo edhe hotelet, janë vijimi i “vuajteve” të krerëve të ministrive, apo drejtorëve që qëndrojnë pas tyre. 10 minutat e ERTV përfundojnë shumë shpejt dhe ministret shpejtojnë që të kurojnë imazhin e tyre.
BoldNews publikoi më parë dokumentet e një tenderi që po zhvillonte Ministria e Drejtësisë. Ministrja Etilda Gjonaj, e cila njihet për luksin e saj, pasi lëviz me dy automjete të tipit të fundit, kërkonte që dy mjetet e saj të laheshin plot 17 herë në muaj. Ndërkohë, makinat e tjera të laheshin vetëm 4 herë! Por, “rekordi” ka zgjatur vetëm disa ditë…
“Konkurentja” e Gjonajt nuk mund të ishte as më pak e as më shumë por Belinda Balluku, ministrja e Infrastrukturës dhe Energjisë. Asaj që i bëhen këpucët me baltë, kalon në mes të dëborës. Apo ecën në shi… vetëm kur del te ERTV.
Sipas disa dokumenteve të tjera që disponon BoldNews, Balluku ka hapur një tënder nën 8 milionë lekë të vjetra, për të larë automjetet e ministrisë. Ajo që bie në sy është se Balluku ka kërkuar që automjeti i saj të lahet plot 20 herë në muaj, nga 17 herë që kërkonte Gjonaj.
Bëhet fjalë për një mjet “Audi A8” me të cilin lëviz ministrja. Ndërkohë, janë bërë edhe disa specifikime të tjëra, ku kërkohet që auto lavazhi duhet të ndodhet në qytetin e Tiranës jo më shumë se 2 km larg institucionit, ndërkohë duhet të këtë 4 post larje dhe 4 vende tharje.
