Menjëherë pasi e mposhti irlandezin, Dustin Porier ishte i interesuar për një ndeshje të tretë dhe të fundit me Conor Mcgregor.
Natyrisht që për Conor dëshira që kjo gjë të ndodhë është më e madhe, teksa kërkon të rifitojë respektin e humbur mes botës së MMA-së. Duke parë këtë situatë UFC-ja është gati të organizojë trilogjinë mes luftëtarëve. Sipas mediave amerikane, kjo sfidë do të zhvillohet në maj të këtij viti.
Dy sportistët dueluan mes tyre dy javë më parë, në eventin UFC-257, me Poirier që fitoi me “KO teknik” në raundin e dytë. Ndërkohë që, vite më parë (viti 2014, UFC-178), ka qenë irlandezi ai që ka mposhtur amerikanin (KO teknik, raundi 1).
Pas duelit të 23 janarit sportistët konfirmuan në deklaratat e tyre idenë e një triologjie, që duket se pëlqehet edhe nga Dana White (eventi arriti 1.6 milionë PPV). Presidenti i UFC-së ka nisur kontaktet me dy luftëtarët për të dueluar sa më shpejt në kafaz.
Për momentin asgjë nuk është zyrtare dhe nuk dihet nëse kjo përballje e tretë do të jetë për titull apo jo. Titulli i këtij Divizioni mbahet ende nga Khabib Nurmagomedov, që në shtator deklaroi tërheqjen e tij nga sporti.
