Drejtori i Përgjithshëm i Policisë së Shtetit, Ardi Veliu, duket se ka ndryshuar profesion. Nga një polic është kthyer në një epidemiolog. Kjo të paktën nga angazhimi i tij, që përmes një mesazhi, bën të ditur se policia ka marrë rolin për të vënë në kontroll pandeminë.
Në fakt pritej që Veliu si Kryepolic të vinte nën kontroll territorin, të luftonte krimin, të reagonte lidhur me përgjimet e publikuara për `Ndraghetan, të jepte garanci se policia nuk do të ndërhynte në zgjedhje, e plot çështje të tjera që kanë të bëjnë me rendin dhe sigurinë.
Por duket se Veliut po i pëlqen më shumë roli si epidemiolog dhe nuk është çudi që ai të jetë pjesë e Komitetit Teknik të Ekspertëve, ose ende nuk e ka kuptuar se ky virusi i padukshëm nuk është ai armiku, i cili luftohet me blinda, tanke, apo policë që dalin dhe dhunojnë.
Gjatë inspektimit në zonën e Tiranës së Re, Drejtor Veliu u ka kërkuar drejtuesve të DVP Tiranë të qëndrojnë në krye të shërbimeve, me qëllim monitorimin e zbatimit të masave antiCovid, jo për të vendosur gjoba, pasi gjoba nuk është aspak qëllimi i Policisë, por me qëllimin e vetëm parandalimin e përhapjes së COVID-19.
Nisur nga shtimi i rasteve, Drejtor Veliu ka theksuar se punonjësit e Policisë në terren duhet të intensifikojnë kontrollet në lokale dhe duhet të ushtrojnë kontrolle të pandërprera në sheshe, bulevarde e në çdo ambient publik, duke treguar zero tolerancë ndaj atyre qytetarëve që nuk respektojnë masat dhe protokollet e sigurisë.
“Policia e Shtetit është e angazhuar për të zbatuar të gjitha detyrat që rrjedhin nga Akti Normativ, në kuadër të pandemisë.
Çdo ditë jemi duke kontrolluar dhe monitoruar masat, por kjo situatë ka ardhur duke u rënduar. Jemi munduar të sensibilizojmë dhe qytetarët të na mirëkuptojnë, por shifrat e fundit në rritje dhe vala e fundit si në të gjithë Europën edhe këtu tek ne, na detyron që ne të veprojmë ndaj çdonjërit që thyen rregullat e vendosura për pandeminë.
Nga ana e Policisë së Shtetit do të ketë tolerancë zero për të gjithë qytetarët që nuk respektojnë masat anticovid, nuk vendosin maska, nuk respektojnë distancimin social dhe detyrimet e përcaktuara në e-Albania, për sa i përket distancave në lokal dhe oraret e mbylljes së lokaleve.
Përfitoj nga rasti t’u bëj thirrje të gjithë qytetarëve, si dhe bizneseve, se Policia e Shtetit do të vazhdojë me seriozitet për të ndëshkuar çdo qytetar i cili nuk respekton këto rregulla”, shprehet Veliu.
Do të ishte krejt normale, sikur në fillim Veliu të jepte disa sqarime për çështje që realisht i përkasin policisë, dhe më pas nëse do të kishte kohë mund të ndihmonte strukturat shëndetësore për pandeminë. Rreth 1 vit nga momenti që kjo pandemi përfshiu Shqipërinë, nuk ka më kuptim që ajo të trajtohet si në muajt e parë me polici dhe ushtri, përderisa nuk zbatohet trinomi: Testo, Gjermo, Trajto.
