Kreu i Urgjencës Kombëtare, Skënder Brataj, tha se shtimi i rasteve të reja me Covid-19, ka të bëjë me mos respektimin e masave nga qytetarët.
Ai tha se lëvizjet apo zhvendosjet e qytetarëve nga Tirana, e cila ka numrin më të lartë të të infektuarve, drejt qyteteve të tjera, bëri që të ketë një përhapje të lartë të të infektuarve në qytete të tjera.
“Festat, ulja e temperaturave, qëndrimi për një kohë të gjatë në lokale të mbyllura, mosrespektimi i masave mbrojtëse, si dhe zhvendosja nga Tirana drejt qyteteve të tjera, sollën këto shifra që kemi sot”, tha Brataj.
Ai nuk përjashtoi mundësinë që edhe Shqipëria të jetë prekur nga shtamet e reja të Covid-19, por tha se presim zyrtarisht përgjigjet nga laboratorët ku janë dërguar mostrat për tu analizuar.
I ftuar në “Real Story”, Brataj tha se mund të ketë një shtrëngim të masave, por kjo do të shihet në raport me situatën.
Sipas tij, pavarësisht shtameve të reja, mjekimi ndaj Covid-19 nuk ndryshon, është i njëjti, sikundër edhe këshillat apo masat që mund të merren.
