Ernest Muçi është emri më “i nxehtë” momentalisht në kampin e Tiranës. Talenti kërkohet nga disa klube europiane ndërsa nuk kanë munguar as ofertat konkrete.
Merkato e dimrit në disa vende si Zvicër, Austri, Kroaci apo edhe vende të tjera nuk është mbyllur ende. Ashtu siç raportohet, Tirana ka disa oferta që janë deri në 600 mijë euro për Muçin.
Burime pranë klubit bardheblu, bëjnë me dije se presidenti Halili ka në dorë fatin e lojtarit. Në tavolinë Halili mund të firmosë çdo kontratë dhe ofertë që i ka ardhur. Burime në klubin bardheblu bëjnë me dije se presidenti i Tiranës do të mendohet deri në datën 7 shkurt, datë që përkon me mbylljen e merkatos në Austri.
Tirana kërkon mbi 700 mijë euro për 19-vjeçarin por mbetet për të zbuluar vendimin e klubit në ditët e ardhshme.
Më parë për sulmuesin kanë ardhur oferta nga Suedia prej Hamarbit, Zvicra Young Boys dhe Zyrihu, nga Kroacia prej Osijekut dhe nga Turqia prej Samsunsporit, por Tirana kërkon të marrë maksimumin nga talenti që ka në ekip.
