Kryeministri Edi Rama ka vijuar sulmet ndaj BE-së, ndërsa paralajmëroi se do të shikohen tregjet alternative të tregtimit të mishit, duke përmendur Turqinë, por edhe Lindjen e Mesme.
Gjatë bashkëbisedimit me qytetarët në Korçë, kryeministri Edi Rama tha se proceset e shtetbërjes ende sot duan kohën e tyre duke shtuar se ndër vite është humbur një gjeneratë sepse nuk janë bërë gjërat e duhura.
Duke folur për tregtimin e mishit, ai tha se në 3-4 vitet e ardhshme është e mundur që të ketë dalje në treg. Kryeministri tha se nuk kemi pse presim deri sa të na hapë dyert BE-ja pasi kemi tregje të tjera alternative, siç është Turqia.
“Ne nuk jemi të detyruar të presim tregun e BE domosdoshmërisht, sepse ka tregje të tjera. Është e mundur që produktet tona të mishit të dalin në tregje të mëdha në Lindje, që nga Turqia në Lindjen e Mesme,” u shpreh ai.
