Partia Demokratike paraqiti sot programin e saj, ku parashikohet që paga minimale të jetë 36 mijë lekë, ndërsa do të dyfishohet ndihma ekonomike për familjet në nevojë.
Kreu demokrat Lulzim Basha tha se nuk ka ndërmend të bëjë premtime të bujshme dhe të parealizueshme, ndërsa theksoi se do të mbajë përgjegjësinë e tij nëse këto premtime nuk do të realizohen.
Ai tha se kjo kulturë e premtimeve pa doganë dhe pastaj braktisjes së tyre totale do të marrë fund. Ndaj nuk kam dalë sot para jush të premtoj gjëra që nuk bëhen kurrë realitet.
Sipas tij, një kryeministër që nuk është i aftë t’i përmbushë angazhimet që merr përsipër duhet të largohet.
“Unë sot marr këtë barrë të përgjegjësisë para jush. Jo pas 8 vitesh por direkt në katër vitet e para sipas një plani të detajuar muaj pas muaji, javë pas jave, ditë pas dite. Ka ardhur koha për ndryshim. Ka ardhur koha ta ndryshojmë Shqipërinë. Ka ardhur koha ta largojmë këtë qeveri e të sjellim një qeveri që kujdeset për njerëzit dhe jo për veten e saj”, tha Basha.
Sipas tij, ka ardhur koha për një qeveri që kujdeset për njerëzit, jo për vete.
“Do të hapim 110 mijë vende pune brenda mandatit të parë qeverisës, do të përmirësojmë klimën e biznesit për ato shqiptare dhe investimet e huaja. Unë angazhohem që të rris pagën minimale dhe ta çoj atë në 36 mijë lekë të reja në muaj. Por s´do të rritet vetëm paga minimale, por do të shtohet edhe të punësuarit”, tha Basha.
Ai u shpreh se ka mbaruar koha e matrapazëve që shesin shpresa boshe, duke shtuar se objektivat e planit tonë, përfitojnë të gjithë familjet.
“Objektivi ynë kryesor, dyfishimi i të ardhurave për frymë. Do të ulim taksën personale në 9 % duke ruajtur fashën minimale.
Për biznesin e vogël dhe të mesëm taksa do të jetë 0.5 % e xhiros. Do të anullojmë taksën Rama prej 24 lekësh të reja për litër për karburantin.
Programi ynë, përgjysmojmë varfërinë”, tha Basha.
Sipas tij, taksa Rama mbi karburantin do të eleminohet dhe nga dita e parë e qeverisë sime, karburanti do të kushtojë 24 lekë të reja më pak se çmimi aktual.
“Për 8 vite Rama jua rriti taksat shqiptarëve dhe i varfëroi ata, unë angazhohem t’i ul taksat mbi të ardhurat personale në 9%, duke ruajtur fashën mbrojtëse ekzistuese prej 30 mijë lekësh, dhe po kështu të vendosim taksën 9% të fitimit mbi të gjitha sipërmarrjet shqiptare me një xhiro vjetore mbi 14 milionë lekë të reja. Unë angazhohem të ul sigurimet shoqërore në vlerën 18%.
Totali i taksave dhe tarifave vendore i bizneseve të vogla e të mesme nuk do të jetë më i lartë se 0.5% e xhiros. Ky është angazhimi im dhe i qeverisë sime për biznesin e vogël e të mesëm. Dua ta përsëris fare qartë sot në nisje të prezantimeve tona, se një nga vendimet e para të qeverisë të dalë nga vota e 25 prillit do të jetë anullimi i taksës Rama prej 24 lekë të reja për litër mbi karburantin”, tha kreu demokrat.
Basha tha se do të ketë më shumë para në xhepat e qytetarëve, që do të thotë se do të shpenzojnë më shumë për kushte jete më të mira, për arsim më të mirë dhe shëndet më të mirë.
“Janë paratë tuaja që sot përfundojnë në xhepat e oligarkëve. Do të rrisim pensionet me jo më pak se dyfishi i inflacionit dhe jo më pak se 5 % në vit. Angazhohem të ul çmimin e energjisë elektrike, duke ndihmuar jo vetëm bizneset, por edhe familjet shqiptare. Ne do të mbulojmë tarifat arsimore universitare për 90 % e familjeve që kanë të ardhura jo më shumë se 640 mijë lekë të vjetra në muaj. Arsimi është gjithçka, për suksesin e çdo të riu dhe të reje, është ajo prej të cilës përfitojmë të gjithë”, tha Basha.
Ai shtoi se fëmijëve do tu ofrohet ushqim falas në shkolla për orët shtesë, ndërsa tekstet shkollore do të jenë falas.
“Çdo familje do të përfitojë një pagesë 3 mijë leke të reja në muaj për 5 vitet e para të lindjes, sikundër do të mbulojmë interesat bankare për kreditë për strehim për 5 mijë çifte të reja çdo vit”, tha Basha.
