Në Izrael fushata e vaksinimit po vazhdon me ritme të shpejta dhe pa shfaqur asnjë problematikë në furnizimin me doza. Duke nisur nga 20 dhjetori, janë shpërndarë rreth 2 milionë e 700 mijë doza Pfizer, e barabartë me mbi 26% të popullsisë. Qëllimi i vendit është vaksinimi i 9.2 milionë njerëzve deri në fund të marsit.
Megjithatë duket se merita e kësaj fushate nuk është vetëm sistemi efikas dhe i strukturuar i shëndetit publik. Sipas Corriere della Sera, Ministria e Shëndetësisë ka nënshkruar një marrëveshje prej 20 faqesh me kompaninë farmaceutike, sipas të cilës Izraeli detyrohet të japë çdo informatë rreth injeksioneve të kryera, deri dhe te krahu se ku do të kryhet injeksioni. Në këmbim, do të jepen 10 milionë doza vaksinash. Lajmi ka alarmuar organizatat që luftojnë për mbrojtjen e privatësisë, ndonëse qeveria ka deklaruar se informacionet do të jenë statistika të përgjithshme dhe publike.
Izraeli konsiderohet si një nga vendet me më shumë të dhëna mjekësore në botë. Që nga viti 1990, vendi vendosi të kalojë nga regjistrimi manual në atë të kompjuterizuar. Duke nisur nga viti 2000, çdo vizitë mjekësore, provë, recetë dhe procedurë mjekësore për përdoruesit e shërbimit shëndetësor është arkivuar në bazat e të dhënave kompjuterike. /Tpi.it
