Sindikata e Minatorëve të Bulqizës do të mbështesë një kandidat të pavarur për deputet në zgjedhjet parlamentare të 25 prillit. Bëhet fjalë për minatorin Elton Debreshi, i cili do të kandidojë më 25 prill si i pavarur në Qarkun e Dibrës.
Vendimi është marrë nga kjo sindikatë pas heshtjes së shtetit lidhur me statusin e minatorit.
Në një njoftim për mediat nga Sindikata e Bashkuar e Minatorëve të Bulqizës, bëhet e ditur se për zgjedhjet e 25 prillit do të mbështetet si kandidat i pavarur një minator.
Gjithashtu, ky vendim është mbështetur edhe nga Organizata Politike, sipas të cilës, ky është një shteg për demokracinë nga poshtë, nga punëtoret dhe ata që e pësojne në të vërtetë.
“Kjo është një formë presioni, veçanërisht ndaj qeverisë, për të kërkuar të drejtën e mohuar prej 30 vitesh: Statusin e Minatorit.
Prandaj do te jemi sërish pranë tyre për t’i mbështetur në çdo hap, njëjtë siç i kemi mbështetur në greva, protesta e organizime për të drejtat e domosdoshme”, thuhet në reagimin e Organizatës Politike.
