Kryeministri Edi Rama ka sqaruar sot sepse synon mandatin e tretë në qeverisjen e vendit. E ndërsa mandatin e dytë e kërkoi me tepsi e timon, për të tretin Rama tha se synon të formalizojë ekonominë e vendit.
Nuk dihet sepse deri më tani, pas 8 vjet qeverisjeje, Kryeministri nuk ka formalizuar ekonominë, për të cilën kërkon një mandat të 3-të, por ajo që mund të thuhet është se vetë Kreu i Qeverisë nuk ka një bilanc për t´u përballur në zgjedhjet e 25 prillit.
Pandemia e Covid-19 nxorri në pah se shëndetësia falas, premtim i bërë prej tij 8 vite më parë, ishte thjesht një gënjeshtër, ndërsa qytetarët e prekur nga koronavirusi, kanë mbuluar shpenzimet e tyre në masë dërrmuese, nga medikamentet më të thjeshta te ato më specifike.
Rama u pyet sot gjatë konferencës për mediat mbi premtimin për hapjen e 300 mijë vendeve të reja të punës, premtim i bërë 8 vite më parë, ndërsa tha se deri tani janë 225 mijë të punësuar më shumë.
“Ne kemi premtuar 300 mijë vende pune dhe sot thjesht duke iu referuar shifrave, jo anketimeve, jo statistikave të nxjerra nga anketimet, por shifrave të regjistrit të punës në Republikën e Shqipërisë, hapeni dhe shikojeni, ju që jeni ndërmjetësit mes palëve në skenën politike apo në mexhelisin e debatit publik dhe qytetarëve. Thojuni njerëzve nëse është apo nuk është e vërtetë që në regjistrin e punës të Republikës së Shqipërisë në vitin 2013 kishte 473.506 vetë të regjistruar dhe në fund të 2019 kishte 698.235 punonjës të regjistruar, janë apo nuk janë 225 mijë më shumë që paguhen dhe paguajnë sipas vendit të punës së tyre”, deklaroi Rama.
Në fakt, thjesht personat që kanë qenë të punësuar, por nuk figuronin në regjistrat e sigurimeve, janë shtuar, por kjo sdo të thotë se Qeveria hapi vende të reja pune. Përkundrazi, referuar statistikave zyrtare, çdo javë deklarohen me qindra biznese të mbyllura dhe shkaku janë taksat e larta dhe varfëria, pra ulja e konsumit apo e xhirove.
Më tej, kryeministri tha se e kërkon mandatin e tretë të qeverisjes për të formalizuar ekonominë.
“Duke sjellë krahasimin me rindërtimin mund të thuhet se nëse sot kantieret tona të rindërtimit dhe secili le të sjellë me imagjinatën e tij para sysh Laçin apo Fushë-Krujën apo Thumanën, apo cilindo tjetër kantier, janë faktikisht një pasqyrë e një situatë ku është vendosur e gjitha infrastruktura nëntokësore, janë vendosur themelet, janë ngritur karabinatë, por faktikisht nuk është ende një situatë e banueshme, në sensin e funksionalitetin e plotë të atyre godinave për të cilat vazhdon puna që të pajisen me të gjitha sistemet e brendshme dhe përfundimisht nga kantiere të kthehen në vendbanime. Kjo është situata edhe në këtë sektor dhe çdo sektor.
Por ama krahasuar me të djeshmen, është një situatë qartësisht e ndryshme dhe është një situatë ku qartësisht mund të shihet e nesërmja, ndërkohë që e djeshmja ishte si situata pas tërmetit. Si situata pas tërmetit ishte dhe situata e llogarive të shtetit, ishte dhe situata e të gjitha të dhënave në aspektin ekonomik dhe fiskal,” tha Rama.
Familjet apo qytetarët, banesat e të cilave u dëmtuar nga tërmeti, vijojnë të qëndrojnë në çadra apo kontejnierë, ndërsa i gjithë procesi i rindërtimit është kthyer në një show dhe propogandë, ku herë shfaqet Erion Veliaj me çelësa në dorë dhe herë shfaqet Edi Rama dhe Arben Ahmetaj, jo më si Kryebashkiakë, Kryeministër apo ministër, por si punonjës të zyrave të strehimit.
