Kryeministri Edi Rama nuk ka nguruar të marrë sot rolin e prokurorit dhe gjykatës lidhur me skandalin e denoncuar nga emisioni Stop, ku një sanitare, duke mashtruar një qytetare se ishte infermiere i ka marrë plot 8 mln lekë që të kujdesej për nënën e saj, e cila vuante nga Covid-19.
Tire Alldervishi u përball sot me Gjykatën, e cila vendosi masën e sigurisë arrest me burg, ndërsa Prokuroria po heton nëse sanitarja, ka bashkëpunuar me personelin mjekësor apo jo.
E ndërsa po zhvillohen hetime, Rama u shfaq duke nxjerrë konkluzionet e tij, një veprim që e ka bërë edhe më parë sa herë ka pasur skandale.
Kryeministri merr rolin e ekspertit, prokurorit, hetuesit, gjyqtarit, gjë që e ka bërë edhe sot duke çuar një mesazh të qartë ndaj Prokurorisë.
Sipas Ramës, në emisionin investigativ ku u publikua rasti korruptiv, nuk u provua që sanitarja kishte bashkëpunuar me persona të tjerë.
Ndërkohë është raportuar se po hetohen si të përfshirë në këtë ngjarje të paktën dhe katër persona të tjerë.
“Unë jam mirënjohës për të gjithë mjekët dhe infermierët, dhe patjetër që jam i keqardhur për atë histori, që faktikisht cënon imazhin, reputacionin dhe punën e jashtëzakonshme të mjekëve dhe infermierëve, dhe krijon pereceptimin se kjo është mënyra e punës së shumë njerëzve.
Ajo që më ka ngrohur është puna e bërë nga gazetarët investigativ, se kanë nxjerrë në pah një llumë tejet të papërtypshëm, njëkohësisht nuk kanë provuar, përkundrazi, në të gjithë invetigimin e tyre nuk kanë provuar se ajo sanitare ishte e lidhur me mjekë apo me infermierë të tjerë.
Është një kambanë alarmi që njerëzit nuk duhet të japin para në këtë mënyrë, pyll pa derra nuk ka, kjo nuk e zhbën punën e të gjithë mjekëve të tjerë”, tha Rama.
Gjykata e Tiranës vendosi sot masën e sigurisë ”arrest me burg” për sanitaren Tire Alldervishaj, e cila akuzohet për veprën penale të mashtrimit, duke qenë se në një periudhë 28 ditore, dyshohet se i ka marrë një shumë prej 8 milionë lekësh të vjetra një shtetaseje, e cila interesohej për shëndetin e të ëmës, e shtruar në spitalin “Shefqet Ndroqi”.
Avokatët e sanitares, u shprehën se ajo disponon prova që tabloja e ngjarjes nuk është ashtu siç është publikuar në media, dhe se persona e përfshirjes së personave të tjerë do të provohet në ditët në vijim. Ata kërkuar një masë më lehtësuese për Alldërvishajn, pasi sipas tyre ndodhej në gjendje të vështirë psikologjike dhe shëndetësore, pasi së fundi ka kaluar edhe Covid 19.
