Banka e Shqipërisë nuk parashikon të rrisë normën bazë të interesit para mesit të vitit 2017.
Guvernatori, Gent Sejko, tha sot se ekonomia shqiptare po vijon rimëkëmbjen sipas parashikimit, e mbështetur nga përmirësimi i konsumit dhe investimeve private.
Sipas tij, politika monetare do të ngelet stimuluese, për të mbështetur rritjen, ndërsa inflacioni pritet të rritet gradualisht dhe pritet të arrijë në 2.3% pas katër tremujorësh. Guvernatori vuri në dukje se normat e interesit të kredive në lekë janë në nivelet më të ulat historike, çka, sipas tij, dëshmon efikasitetin e politikës monetare.
Ai tha se edhe rritja sasiore e kredisë në lekë është mëse pozitive: duke përjashtuar kreditë e fshira, në fund të shtatorit, kredia në lekë ishte në rritje vjetore me 8.6%. Guvernatori vlerësoi se projektbuxheti i vitit të ardhshëm është në përputhje me pritshmëritë e Bankës së Shqipërisë, për ulje të mëtejshme të borxhit publik.
Ai vlerësoi se rritja e rrogave dhe pensioneve do të kenë efekt pozitiv në kërkesën e brendshme, por, referuar ecurisë së huamarrjes dhe shpenzimeve publike, kërkoi edhe njëherë shmangien e përqendrimit në periudha të veçanta dhe shpërndarjen e tyre gjatë vitit.
Në mbledhjen e të mërkurës, Këshilli Mbikëqyrës i Bankës së Shqipërisë vendosi të mbajë të pandryshuar normën bazë të interesit në nivelin 1.25%.
