Presidenti Bujar Nishani dekoroi sot me medaljen më të lartë 38 martirët e Kishës Katolike që u lumturuan nga Vatikani.
Në fjalën e tij, Presidenti Nishani ka kërkuar ndjesë në emër të shtetit shqiptar për krimet e komunizmit.
Dekorimi nga kreu i shtetit vjen pak ditë pas lumturimit të 38 martirëve të Kishës Katolike në Shkodër, me nismë të Papa Françeskut.
Fjala e Nishanit
“Gjithë jetën jetuan dhe ushtruan vokacionin brenda formulës ‘atdhe dhe fe’ , qëndruan heroikisht përballë torturave dhe vendimit që i dënonte me vdekje.
Mund të themi se ishin klerikë dhe intelektualë, mendimtarë të këtij vendi në të gjitha ngjarjet e rëndësishme nga Rilindja kombëtare, te konsolidimi i shtetit pas 1912 etj.
Krijuan modelin e qëndresës dhe përballjes kundër tiranisë që i kishte shpallur luftë edhe Zotit.
Papa Franccesku, i shpalli të lumë duke i bërë pjesë të historisë së përbotshme.
Duke na ftuar edhe ne të ndahemi nga dogmat totalitare, ata nuk kanë nevojë për asgjë, ndërgjegjja jona ka nevojë që të kërkojë falje, të identifikohet me ta, ka nevojë ti nderojë ata, t’u rrëfejë fëmijëve për ata.
Pranimi i krimeve të regjimit komunist dhe kërkesa për falje drejtuar familjarëve të viktimave na ndihmon të gjithëve të ecim përpara pa pasur frikë nga fantazmat e të kaluarës.
Me shumë përulësi kërkoj falje të sinqertë në emër të shtetit familjarëve dhe pasardhëseve të viktimave të diktaturës komuniste.
I kërkoj falje Kishës Katolike shqiptare dhe kujtdo tjetër që u prek deri në palcë, që u vra pafajësisht, që u përndoq deri në tre breza dhe u internua padrejtësisht.
Shteti shqiptar u kërkon përulësisht ndjesë.
