Kryeministri Edi Rama ka publikuar mëngjesin e sotëm një njoftim lidhur me rimbursimin e trajtimit për koronavirusin në banesë.
Në një postim në rrjetet sociale kreu i qeverisë shprehet se rimbursimi mund të merret më thjeshtë përmes aplikimit në e-Albania.
“MIRËMËNGJES
me rinjoftimin se përmes aplikimit në E-albania mund të merret krejt kollaj paketa 100% e rimbursueshme për trajtimin ambulator anti-Covid19 në banesë”, shkruan Rama.
Javë më parë, Ministria e Shëndetësisë, publikoi edhe skemat mbi rimbursimin e medikamenteve që përdoren nga qytetarët e prekur nga Covid-19, kur ato trajtohen në banesa.
Sipas procedurave, mjeku i familjes përshkruan recetën sipas protokollit, në varësi të gjendjes së pacientit. Me kodin e recetës një i afërm i pacientit paraqitet në farmacitë me kontratë me FSDKSH për të marrë barnat falas.
Qeveria vendosi rimbursimin e paketës së barnave për trajtimin ambulator në banesë për personat e diagnostikuar me COVID-19 nga Fondi i Sigurimit të Detyrueshëm të Kujdesit Shëndetësor.
Sipas vendimit të qeverisë, paketa e barnave për trajtimin ambulator në banesë të pacientëve të diagnostikuar me COVID-19 përbëhet nga dy skema trajtimi, në përputhje me formën e sëmundjes, sipas udhëzuesit të miratuar nga Komiteti Teknik i Ekspertëve.
Vlera e rimbursimit të paketës së barnave për skemën 1 të trajtimit (forma e lehtë) do të jetë jo më shumë se 1650 (një mijë e gjashtëqind e pesëdhjetë) lekë.
Vlera e rimbursimit të paketës së barnave për skemën 2 të trajtimit (forma e mesme) do të jetë jo më shumë se 10900 (dhjetë mijë e nëntëqind) lekë.
