Qeveria e Suedisë sot paraqiti një ligj që jep kompetenca të reja të përkohshme për të luftuar pandeminë e koronavirusit dhe plani është që zbatimi i tij të fillojë në janar.
Qeveria, e cila deri më tani është mbështetur kryesisht në rekomandime, shpjegoi se ligji i ri do ta lejojë atë të miratojë masa kufizuese dhe të vendosë sanksione në rast të mosrespektimit.
Kështu do të jetë në gjendje të mbyllë dyqanet, qendrat tregtare ose transportin publik, apo edhe të kufizojë numrin e njerëzve që lejohen të mblidhen në vende të caktuara publike, në vend që të vendosë masa të përgjithshme.
Qeveria dëshiron që ligji të hyjë në fuqi më 10 janar, por ai do të duhet të miratohet nga parlamenti së pari.
