Ndërtimi i Korridorit të Tetë shihet me interes për biznesin maqedonas.
Gjatë punimeve të forumit të tretë të biznesit dhe investimeve Shqipëri- Maqedoni, që u zhvillua të mërkurën në Tiranë, ambasadori i Maqedonisë në Shqipëri, Stojan Karajanov tha se me rëndësi kyçe për të dy shtetet është lidhja infrastrukturore dhe me përfundimin e korridorit të tetë hapen mundësi të mëdha për lidhjen e porteve detare të Turqisë dhe të Bullgarisë me portet detare të Shqipërisë që janë një mundësi e jashtëzakonshme edhe për biznesin maqedonas. Maqedonia e Shqipëria si shtete fqinje të parë, ndajnë aspirata të njëjta në kuadër të proceseve të integrimit euroatlantik dhe zhvillimit e përparimit të bashkëpunimit rajonal, i cili, nënvizoi ai, duhet të intensifikohet në të gjitha sferat ekonomike.
Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi u shpreh se bashkëpunimi me rajonin na mësoi se kemi potenciale të mëdha së bashku, por dhe për të çuar më tej kooperimin. Ajo informoi se shumë shpejt do të nënshkruhet marrëveshja e bashkëpunimit mes Agjencisë së Zhvillimit të Investimeve dhe përfaqësisë maqedonase në pjesën veriore. “Kjo do të na sjellë lehtësi për investimet strategjike, pajisjen me leje dhe licenca”, u shpreh më tej ekonomi. Gjatë forumit, vuri në dukje Ekonomi, bizneset kanë mundësi që të shkëmbejnë informacione për zonat teknologjike dhe industriale.
Shqiperi-Maqedoni-Forumi biznesit dhe investimet Foto Flori Abazi (2)“Dy vendet tona aspirojnë të kenë një hapje më të madhe të kapitalit, lëvizje më të lirë të shërbimeve, të shkëmbimit të eksperiencave sipërmarrëse. Këtë lloj bashkëpunimi vendet tona nuk e gjejnë vetëm në takimet e drejtpërdrejtë si ndodhi këto dy ditë, por edhe me tavolina të rrumbullakta apo forume rajonale”, deklaroi Ekonomi,
Më tej, ministrja informoi edhe mbi lehtësitë për të investuar në vendin tonë. Qeveria shqiptare, vijoi Ekonomi, ka ndërmarrë lehtësi në drejtim të investimeve strategjike, lehtësi që kanë të bëjë me krijimin e një dritareje unike, lehtësimin e procedurave apo afatet e përshpejtuara që qeveria vë në dispozicion të investitorëve strategjik, pajisjen me leje, licenca dhe autorizime.
Presidentja e Unionit të Dhomave, Ines Muçostepa theksoi se duhen krijuar mundësi të rrisin bashkëpunimin mes dy vende. “Bizneset kanë përfitime nga këto aktivitete. Ne jemi partnere të denjë. Aspiratat tona janë që të shtojme aktivitetin në Maqedoni”, u shpreh ajo.
Shqiperi-Maqedoni-Forumi biznesit dhe investimet Foto Flori Abazi (4)Ndërsa Kryetari i Dhomës së Tregtisë dhe Industrisë Tiranë, Nikolin Jaka u kërkoi autoriteteve pjesëmarrëse që të merren masa që ta kthejnë strukturën portuale efikase për vendin dhe rajonin. Nga ana tjetër, ai theksoi se duhet të detajojmë dhe ndajmë detyrat në bashkëpunimin mes nesh. ” Qeveria të marrë përvojat e Maqedonisë, për zonat e lira, por edhe për sistemin fiskal tarifor që është nga më të mirat”, theksoi Jaka.
Zyra Ndërkombëtare Invest Macedonia – Shqipëri dhe Kosovë organizoi për herë të parë një tryezë ekonomike të nivelit të lartë me përfaqësues të biznesit të Maqedonisë dhe qeverisë shqiptare, takime të cilat kanë nisur me 14 Mars 2016 dhe përfundojnë ditën e sotme. Ky aktivitet i pari i këtij lloji realizohet falë edhe bashkëpunimit të rëndësishëm që kanë dhënë Oda Ekonomike e Maqedonisë Veri-Perëndimore dhe Unioni i Odave Ekonomike të Maqedonisë.
Drejtuesit e dy Odave, si dhe një përfaqësi e 35 bizneseve më të rëndësishme në Maqedoni zhvilluan takime me autoritetet m të larta të vendit për të promovuar potencialet e mëdha ekonomike mes Maqedonisë dhe Shqipërisë. Ndërsa shkëmbimet tregtare mes dy vendeve tona në 2015-ën llogariten 460 milionë dollarë.
