Të tjera detaje dalin në dritë nga ngjarja e rëndë që u regjistrua sot në fshatin Zavalinë të njësisë Administrative të Gjinarit, ku një 45-vjeçar hapi zjarr ndaj policisë.
Ishin banorët e fshatit ata që kishin bërë denoncimin për shtetasin Josif Kavajën, i cili sipas tyre në orë të ndryshme të ditës qëllonte me armë, duke terrorizuar mbarë vendin përreth.
Ata këtë shqetësim ia kishin shprehur policisë, ndërsa kjo e fundit përmes një urdhri gjykate kishte shkuar për të ushtruar kontroll në banesën e 45-vjeçarit, për armë. Burime të grupit hetimor thanë se Josif Kavaja është një person me probleme të shëndetit mendor.
Ndërkohë që mësohet po ashtu se ai kishte qëlluar me kallashnikov për disa minuta ndaj policisë, ndërsa fatmirësisht asnjë person nuk është lënduar. Më pas ai është fshehur në masivin pyjor që ndodhet në këtë fshat, ndërsa policia i është vënë pas për ta kapur.
