Nga BoldNews.al
Rilindja ka filluar prej disa kohësh fushatën për zgjedhjet e 25 Prillit 2021. Institucionet qendrore dhe lokale janë vënë në “radhë” për të bërë tendera me shumë 0 nga mbrapa, ku fituesit janë firmat e oligarkëve, por edhe të të afërmve të ministrave, deputetëve apo edhe drejtorëve të rëndësishëm.
Dritan Agolli, drejtori ekzekutiv i Fondit Shqiptar të Zhvillimit, pasi shëtiti në Bashki dhe në një firmë private, mësoi shumëçka në bërjen e letrave për projektet miliona-euroshe. Duke qenë drejtues në sektorë shtetërore dhe private, Agolli është kujdesur që të “gostisë” të gjitha palët. Ai pasoi në detyrë Benet Becin dhe shumë shpejt ka vepruar me të njëjtën mënyrë, duke i dhënë përparësi firmave afër pushtetit. Boldnews ka siguruar dokumentet e një tenderi që ka zhvilluar FSHZH me vlerë rreth 3 milionë euro, ku fitues është bashkimi i disa firmave “të majta”.
Sipas dokumenteve që disponon Boldnews, Fondi Shqiptar i Zhvillimit ka bërë një tender me objekt “qendrat e ekselencës për zhvillim rajonal dhe vendor”. Fondi për tenderin ka qenë 360 milionë lekë të rinj pa TVSH (Me TVSH rreth 3 milionë euro). Në tender kanë marrë pjesë 8 firma, duke zhvilluar deri diku një garë, me ofertat e paraqitura pranë anëtarëve të komisionit të vlerësimit të ofertave.
Por, 6 prej firmave janë s’kualifikuar me pretendimin se nuk kishin plotësuar kërkesat e Fondit Shqiptar të Zhvillimit. Pas hapjes së “zarfave” ka rezultuar se fitues është bashkimi i operatorëve ekonomikë “ARKONSTUDIO”, “Ed Konstruksion” dhe “Alko Impex General Construction”. Këto firma ofruan 335.000.000 lekë pa TVSH.
Por, kush janë fituesit e këtij tenderi? Le t’i marrim radhë. Kompania ARKONSTUDIO ka si objekt pune projektet ndërtimore. Një nga ortakët e saj është z.Erjon Këri, kandidat për deputet në zgjedhjet parlamentare nën siglën e Partisë Socialiste në Berat. Erjoni është një nga “pinjollët” e familjës Këri, që kanë pasur bazën në Kuçovë, ku anëtarë të saj kanë qenë deputetë, kryetar bashkie e madje edhe drejtora të rëndësishëm në Tiranë. Pra, socialiata “të betuar”, madje të Kuçovës, qytet të cilin e ka përshkruar mjaft mirë Bashkim Fino; edhe xhupin të lë në Kuçovë, sërish fitoj!
Ndërkohë, bashkëortaku i firmës së z.Këri është as më pas e as më shumë por Arbër Abazi, nipi i deputetit Sadri Abazi. Ky i fundit është pronar “me letra” i kompanisë “Alko Impex General Construction”, e cila vetëm gjatë “mbretërimit” socialist në këto 7 vite ka fituar më shumë se 30 milionë euro me tendera. Pra, një socialist i “thekur” si Dritan Agolli ka shpërblyer dy pinjollë socialistë, Këri dhe Abazi.
